खरसाङ्को मोटर स्ट्याण्डदेखि केही पर धोबी खोला तर्फ प्रधान प्रेटोल पम्प नजिक राष्ट्रिय राजमार्ग 110 को देवाल दुई दिनको लगतार वर्षामा झरेको छ। सड़कको तल्लो किनारको देवाल झरेपछि सड़क मुनि रहेको रेलवेको क्वार्टरको भित्ताले झरेको देवाललाई थामेर राखेको छ। जसको कारण रेलवे क्वार्टरमा बसिरहेका रेल कर्मचारीहरू ठूलो समस्या अनि जोखिममा परेका छन्। सड़कको देवाल अझ झरेको खण्डमा उक्त रेलवे क्वार्टरको भित्ता भत्किने र ढुङ्गा-माटो क्वार्टर भित्र पस्ने सम्भावना रहेको छ। सड़कको देवाल झरेर क्वार्टरको भित्तामा अड़ेसिएकोले वर्षाको समयमा पानी क्वार्टर भित्र पसिरहेको छ। शनिवार राष्ट्रिय राजमार्ग पूर्वाधान विकास निगम लिमिटेडका इञ्जिनियरहरू आएर यस क्षेत्रको निरीक्षण गरेपछि देवाल झरेको सड़कको भागलाई बार्ने काम गरिएको छ।
यस विषयमा स्थानीय चन्दन प्रसादले भने, राष्ट्रिय राजमार्गको यस स्थानमा वर्षाको भल सड़कमा बग्ने गरेको छ। सड़कमा बगेको भल सड़कको तल्लो भागमा रहेको ढालु स्थानमा जमिने गरेकोलेनै यहाँको देवाल झरेको हो। यहाँ सड़कको देवाल झरेपछि हामीले राष्ट्रिय राजमार्ग एवं पूर्वाधानर विकास निगम लिमिटेडलाई बारम्बर खबर दिएपछि आज शनिवार विभागका अभियन्ताहरू आएर निरीक्षण गरी देवाल झरेको स्थानको सड़कमा बार लगाउने कार्य गरिएको छ। विभागका अभियन्ताहरूले आगामी दुई-तीन दिनमा सड़कको मरम्मती कार्य आरम्भ गरिने आवश्यवसन दिएर गएका छन्। भारतीय जनता पार्टीका दार्जीलिङ जिल्ला प्रवक्ता समेत रहेका प्रसादले प्रधान प्रेटोल पम्प नजिको यस स्थानमा वर्षाको भल सड़कमा बग्ने भएकोले जनसाधरण, विद्यार्थी, चालक, दुईचक्को सवारहरू समस्यामा पर्ने गरेको गुनासो गर्दै यो समस्या समाधानको माग गरेका छन्।
