टिस्टा , सिलगडी, नेउपाने,
गान्तोक, ७ जुन: सिक्किमको काबी लुङचोक अन्तर्गत लिङ्दोक निवासी एकै परिवारका चार सदस्य सवार रहेको कार हराएको घटनाले दुःखद अन्त्य पाएको छ। जुन ५ को साँझदेखि सम्पर्कविहीन भएको SK 01 PC 9872 नम्बरको कार अन्ततः टिस्टा नदीभित्र फेला परेको छ भने कारभित्र सवार चारै जनाको मृत्यु भएको पुष्टि गरिएको छ।मृतकहरूमा स्मारिका नेओपाने (२८), शैब्य नेउपाने (२७), जिका दाहाल (२७) र ५ वर्षीया दित्या क्षेत्री रहेका छन्। उनीहरू आफ्ना अभिभावकहरूको उपचारका लागि सिलगडीतर्फ जाँदै गरेका थिए। परिवारका सदस्यहरूले शनिबार बिहान सहयोगको आग्रह गरेपछि खोजी कार्य सुरु गरिएको थियो। यसक्रममा सांसद राजु बिष्टको कार्यालय तथा दार्जिलिङका समाजसेवी विक्रम राईसँग पनि सहयोग मागिएको थियो। त्यसपछि एनडीआरएफ (NDRF), पश्चिम बंगाल प्रहरी र पश्चिम बंगाल ट्राफिक प्रहरीले संयुक्त रूपमा व्यापक खोज तथा उद्धार अभियान सञ्चालन गरेका थिए। प्रारम्भिक अनुमानअनुसार कार बाघपुल नजिकको भीरबाट खसेको हुनसक्ने आशंकामा खोजी कार्य तीव्र बनाइएको थियो। दिनभरको खोजीका क्रममा पहिरो प्रभावित क्षेत्रमा कारका केही भागहरू फेला परेका थिए। गहिरो भीर र कठिन भौगोलिक अवस्थाका कारण उद्धार कार्य चुनौतीपूर्ण बने पनि साँझतिर कार तीस्ता नदीको गहिराइमा फेला पारिएको थियो। आइतबार बिहान पुनः उद्धार अभियान सञ्चालन गरिएपछि प्रहरी स्रोतले कारभित्र रहेका चारै जनाको शव बरामद गरिएको पुष्टि गरेको छ। यस दुःखद घटनाले सम्पूर्ण सिक्किमलाई स्तब्ध बनाएको छ। शोक सन्तप्त परिवारप्रति गहिरो समवेदना व्यक्त गर्दै दिवंगत आत्माहरूको चिरशान्तिको कामना गरिएको छ। साथै खोज तथा उद्धार अभियानमा अथक सहयोग पुर्याउने एनडीआरएफ, पश्चिम बंगाल प्रहरी, पश्चिम बंगाल ट्राफिक प्रहरी, सांसद राजु बिष्ट, समाजसेवी विक्रम राई, स्थानीय बासिन्दा तथा स्वयंसेवकहरू प्रति हार्दिक आभार व्यक्त गरिएको छ।
