खरसाङ, (निसं)ः खरसाङको नयाँ बजारस्थित ब्याङ्क डाँड़ा अथवा ठकुरी चोकबाट ओह्रालो लागेर खरसाङ थाना नजिक दोकान डाँड़ा निस्कने कप्तान रामसिंह ठकुरी पथको निर्माण कार्य लगभग सकिएको छ। दुर्बिन डाँड़ा पछिल्तिर यो सड़कको निर्माण कार्य विगत केही वर्षदेखि चलिरहेको थियो भने वर्तमानमा सड़कमा अलकत्राको पिच गर्ने कार्य, देवाल लगाउने कार्य सकिएको अवस्थामा पाइएको छ। सड़कको लगभग आधा भागमा स्ट्रीट लाइट पनि जड़ान गरिएको पाइएको छ।
यो सड़क कप्तान रामसिंह ठकुरी चोकदेखि अह्लालो राजबारी, रानीकुप हुँदै दुर्बिन डाँड़ाको पछिल्तिरबाट खरसाङ थाना नजिक दोकान डाँड़ामा निस्किन्छ। रोडको निर्माण कार्य लगभग सकिएको भए तापनि यहाँ अहिले वारपार गाड़ी चलेको देखिएको छैन, तथापि नयाँ बजार, राजबारी, रानीकुपका गाड़ीहरू यस रोडमा अघिबाटै चलिरहेका छन्। नव निर्मित रोडमा घुम्न आउने मानिसहरूको चहल पहल भने देखिएको छ। जीटीएको प्रथम कालमा निर्माण कार्य थालिएको यो रोडको निर्माण कार्य धेरै समय स्थगित रहेको थियो। जीटीएको दोस्रो कालमा रोडको निर्माण कार्य पुनः शुरु गरिएपछि वर्तमानमा निर्माण कार्य सिद्धाइएको छ।
खरसाङका धेरै मानिसहरूले यो रोड पर्यटन दृष्टिकोणले महत्वको बताइरहेका छन्। यो रोड नयाँ बजारको कप्तान रामसिंह ठकुरी चोकबाट शुरु भएर चिया बगान क्षेत्र हुँदै दुर्बिन डाँड़को पछिल्तिर जङ्गल क्षेत्र भएर जाने भएकेोले खरसाङ घुम्न आउने पर्यटकहरूको निम्ति घुम्नलाई उपयुक्त क्षेत्र हुने खरसाङ्का कतिपय मानिसहरूको मत छ। स्थानीयहरूले पनि यो रोडमा गाड़ी चलाचल नगरिएको खण्डमा बिहान बेलुका घुम्नलाई उपयुक्त स्थान बन्ने बताएका छन्। जीटीएले पङ्खाबारीमा गाड़ी जामको स्थितिमा प्रयोग गर्न सकियोस् भनी लिङ्क रोडको रुपमा यो सड़क निर्माण गरेको बताइएको छ भने कतिपय मानिसहरूले यो रोडमा गाड़ी चलाचल नगरेर पर्यटकहरूको निम्ति घुम्ने स्थानको रुपमा विकसित गर्न सकिएको खण्डमा असल हुने सुझाउ दिएका छन्।
स्मरण गराइन्छ, अघिको जीटीए कालमा खरसाङमा पर्यटन महोत्सवको आयोजना गरिएको समय यस रोडमा घोड़चढ़ीको कार्यक्रम राखिएको थियो। त्यस समय दुर्बिन डाँड़ा पछिल्तिरको रोडको भाग निर्माण गरिएको थिएन। यो रोड पर्यटन क्षेत्रको रुपमा विकास गरेर थाना नजिक दोकान डाँड़ाबाट खरसाङ बजार आउने गाड़ीहरू चलाइएको खण्डमा पर्यटकहरू यहाँ घुमेर थाकेको अवस्थामा गाड़ी चड़ेर बजारसम्म आउन सक्ने सम्भावना पर्याप्त रहेकोले चालकहरूले रोजगार प्राप्त गर्ने पनि मानिसहरूको मत छ। यस रोडलाई पर्यटन क्षेत्रको रुपमा विकास गरेर दुर्बिन डाँड़ा पछिल्तरको भागमा टी स्टलहरू राखिएको खण्डमा पनि रोजगारको सम्भावना पैदा हुने मानिसहरूको मत छ।
