गोर्खा जनमुक्ति मोर्चाका केन्द्रिय अध्यक्ष बिमल गुरुङले दार्जीलिङ बिधान सभा क्षेत्रका समष्टिहरूमा आफ्नो जनसमर्थकहरूलाई भेटघाट गर्ने कार्यक्रमलाई निरन्तरता दिंदै चुङथुङ, मारेबुङ, तामसाङ समष्ठि अन्तर्गत मेम चिया कमानको स्थलगत भ्रमण गरि स्थानीय आफ्नो समर्थकहरू संग भेटघाट गरेका छन्। वर्तमान चिया कमानहरूमा हाम्रो चिया श्रमिकहरुले भोग्न परिरहेको समस्याहरू, हप्ता दिनभरि रूझीभिजी काम गरे तापनि कामको ज्याला खर्च सठीक समयमा नपाएको जनगुनासो, कतिपय चिया कमानहरू घरि घरि बन्द हुने गरेकोले हाम्रो चिया श्रमिकहरुलको भविष्य कतै सुरक्षित छैन भन्ने जनगुनासो पोख्छन् चिया श्रमिकहरु।
गोर्खा जनमुक्ति मोर्चा अनि बिमल गुरूङको समयमा चिया कमानवासी अनि श्रमिकहरुले यस्तो दुःख कहिले झेलेका थिएनन्, यसैले अब फेरि यो दार्जीलिङ पहाडमा बिमल गुरुङलाई नै ल्याउन पर्छ, गोजमुमो नै सत्तामा आउनु पर्छ भन्छन् श्रमिकहरू । अर्कोतिर यसअअघि मोर्चाका केन्द्रिय अध्यक्ष बिमल गुरुङले दार्जीलिङ बिधान सभा क्षेत्रका समष्टिहरूमा आफ्नो जनसमर्थकहरूलाई भेटघाट गर्ने कार्यक्रमलाई निरन्तरता दिंदै लेबुङ बदमताम समष्टि अन्तर्गतका तल्लो हरसिंगदेखि बेनेकबर्न चिया कमान हुँदै रात्रिको समयमा पनि गींग गेलोङटार साथै धर्मशालाको भ्रमण गरेका थिए।
यो जनसम्पर्क अभियानमा मोर्चा केन्द्रिय अध्यक्षको साथमा लेबुङ बदमतामबाट बदमताम पञ्चायत क्षेत्रका निर्वाचित समिति सदस्य दिनेश राई, गोजयुमो केन्द्रिय सदस्य जितेन तामाङ साथै समष्टिबाट सुवास प्रधान, प्रमोद छेत्री, अनिल राई आदिको सहभागिता रहेको थियो। दुर्गम क्षेत्रका मानिसहरूको विविध समस्याहरू, मोर्चा समर्थकहरू संगको माया सबैभन्दा महत्वपूर्ण २०१७ मा गोर्खाल्यान्डको जनआन्दोलनमा जनताले भोगेका पीडा अनि संघर्षलाई केही जातीय गद्दारहरूले बेचिदिए भन्ने गुनासोहरू जनताको मुखबाट सुन्दा मोर्चा केन्द्रिय अध्यक्ष भावुक पनि देखिएका थिए।
