खरसाङ, (निसं)ः गोर्खा जनमुक्ति मोर्चा केन्द्रीय समिति सहसचिव एवं प्रवक्ता अनिल लोप्चनलाई पार्टीबाट निष्कासन गरिएको छ। बुधवार गोर्खा जनमुक्ति मोर्चा केन्द्रीय समिति कार्यालय सचिव दिपेन्द्र देवानले अनि लोप्चनलाई पार्टीको पद अनि साधरण सदस्यबाट निष्कासन गरिएको जानकारी दिएका छन्।
दिपेन्द्र देवानले अनिल लोप्चनको निष्कासनको बारेमा बताउदै भनेका छन्, अनिल लोप्चनले पार्टीको संविधान र सिद्धान्तको परिधिभन्दा बाहिर गएर पार्टीविरुद्ध अभिव्यक्ति दिएका छन्। यति मात्र होइन, तिनले कुनै प्रमाणबिना नै पछिल्लो चुनावमा केन्द्र सरकारसँग पैसाको लेनदेन सम्बन्धी सम्झौता भएको भन्ने गम्भीर आरोप गोर्खा जनमुक्ति मोर्चामाथि लगाएका छन्। यस प्रकारको आधारहीन आरोपले पार्टीको गरिमा, विश्वसनीयता र छविमा गम्भीर प्रहार गरेको छ। आज सार्वजनिक भएको पार्टीका महासचिव रोशन गिरी र माननीय पूर्व सांसद एसएस आहलुवालिया बीचको अडियो क्लिपले यी आरोपहरू निराधार र कपोलकल्पित रहेको स्पष्ट पारिसकेको छ। देवानले अघि भनेका छन्, पार्टी अनुशासन उल्लङ्घन गरेको, पार्टीविरुद्ध निराधार र मानहानिकारक अभिव्यक्ति दिएको तथा संगठनको हितविपरीत गतिविधि गरेको कारण गोर्खा जनमुक्ति मोर्चाको केन्द्रीय समितिले अनिल लोप्चनलाई केन्द्रीय समिति सहसचिव पदबाट तत्काल प्रभावबाट निष्कासन गर्ने निर्णय गरेको छ। लोप्चनलाई पार्टीको साधारण सदस्यताबाट समेत निष्कासित गरिएको जानकारी गराइन्छ। पार्टी आफ्नो सिद्धान्त, पारदर्शिता र गोर्खा जनताको आकांक्षाप्रति सदैव प्रतिबद्ध रहेको छ। सम्पूर्ण कार्यकर्ता र समर्थकहरूलाई एकजुट रहन तथा यस्ता निराधार प्रचारबाट भ्रमित नहुन आग्रह गर्दछौंँ।
