खरसाङ, 29 जून (निसं)ः गोर्खा राष्ट्रिय नारी संगठन खरसाङ ब्राञ्च कमिटीद्वारा गोर्खाहरुको मौलिक सांस्कृतिक पर्व असार पन्ध्र खरसाङ बजारस्थित वर्द्धवान रोडमा रहेको पार्टी कार्यालयमा एक विशेष कार्यक्रमसहित मनाइएको छ। यसबारे जानकारी पार्टीका मिडिया सेल प्रभारी दिनेस साम्पाङले बताएका छन्, असार पन्ध्रको कार्यक्रम गोर्खा राष्ट्रिय नारी संगठन केन्द्रीय समितिकी अध्यक्ष शान्ती लामाको अध्यक्षतामा सम्पन्न भएको हो। कार्यक्रममा गोरामुमो खरसाङ ब्राञ्च कमिटी अध्यक्ष निमा लामा, सचिव युद्ध छेत्री, केन्द्रीय समिति सदस्य पारस गुरुङ, प्रचार प्रसार सचिव भुपेन्द्र गुरुङ, खर्साङ शहर समष्टिका अध्यक्ष सञ्जय छेत्री, गोरानासं प्रतिनिधिहरू अनि खरसाङ ब्राञ्च कमिटीका सम्पूर्ण सदस्यहरूको सक्रिय उपस्थिति रहेको थियो। पार्टी कार्यालयमा आयोजित कार्यक्रममा गोरानासं खरसाङ ब्राञ्च कमिटी सचिवा कमला राईले आफ्नो मन्तव्य राख्दै भनिन्, आज हामीले गोरामुमोका संस्थापक अध्यक्ष सुवास घिसिङको तस्वीरमा दीप प्रज्वलन गरी, दही–चिउराको टीका लगाई, दही चिउरा खाएर असार पन्ध्र पर्व उल्लासपूर्वक मनाएका छौँ हामी जनजाति समुदायका भएकाले आफ्नो मौलिक संस्कृति पर्व र परम्पराको संरक्षण गर्ने हाम्रो दायित्व हो, यही भावनासहित गोरामुमोले यस पर्वलाई निरन्तर पालन गर्दै आएको हो। राईले थप जानकारी गराउँदै भनिन्, गोरामुमो संस्थापक अध्यक्ष सुवास घिसिङको मार्गदर्शन अनुसार यस पर्वलाई संरक्षण गर्दै आएका छौँ र हाल अध्यक्ष मन घिसिङको नेतृत्वमा पनि प्रत्येक वर्ष यस पर्वलाई निरन्तर रुपमा पालन गर्दै आएका छौँ। असार १५ देशभर विभिन्न तरिकाले मनाइन्छ तर गोर्खा समुदायमा दही–चिउरा खाएर यस पर्व मनाउने विशेष परम्परा छ। यो पर्व केवल सांस्कृतिक मात्र नभई किसानहरूको सम्मानको प्रतीक पनि हो। कमला राईलेअघि भनिन्, आजको दिन दही–चिउरा खाँदै किसानहरू नाच–गान गर्दै रोपाइमा रमाउँछन्। किसानहरूलाई प्रोत्साहन दिन र हाम्रो संस्कृति बचाउन हामी सबैले असार १५ को महत्वलाई बुझ्नुपर्छ। यो पर्व गोर्खा समाजको गौरवशाली परम्परा हो, जसलाई संरक्षण गर्नु हामी सबैको साझा कर्तव्य हो। गोर्खा राष्ट्रिय नारी संगठनको तर्फबाट सम्पूर्णमा असार पन्ध्रको शुभकामना व्यक्त गर्दछु।
