खरसाङ शहरको गाड़े घाउ जतिकै बनेको शहर तर्फ राष्ट्रिय राजमार्ग 110 मा भल बग्ने समस्या समाधान हुने आशा देखिएको छ। यहाँको रिलायन्स स्मार्ट बजार नजिक रहेको भगतवीर झोड़ाको कलभर्ट खोल्ने कार्य अहिले धमाधम चलिरहेको छ। बुधवार पनि यहाँको कलभर्ट खोल्ने कार्य गरियो भने कलभर्ट मुनिबाट लगिएका पाइपहरू काट्ने कार्य पनि भयो। कलभर्टमा पसेको ढुङ्गा-मोटा, फोहोर-मैला निकालेर पाइपहरू काट्ने काम गरिएपछि झोड़ाको भल कलभर्टबाट छिर्न सक्ने आवस्था बनेको छ।
कलभर्ट खोल्ने कार्य गरिरहेका कामदारहरूले कलभर्ट भित्रबाट लगिएका सबै पाइप काटेर निकालिने बताए भने कलभर्ट पूर्ण रुपले सफा गरेर भल बग्न सक्ने योग्यको बनाउन अझ एक दिन वा दुई दिन लाग्न सक्ने बताए। यहाँको कलभर्ट खोल्ने अनि कलभर्ट भित्रबाट लगिएका पाइपहरू काटेर निकाल्ने कार्य गरिएपछि बुधवार यस कलभर्टबाट सजिलै झोड़ाको भल बगेको देखियो। तथापि खरसाङ टुरिष्ट लज तर्फबाट आएको ठूलो भल भने यो कलभर्ट रहेको स्थानलाई पार गरेर शहरतर्फ बगेको थियो। टुरिष्ट लज तर्फबाट आएको ठूलो भल शहर तर्फ बगेकोले शहरको मूल सकड़मा पानी बग्ने समस्या यथावत देखिए तापनि अघिका दिनहरूको तुलनामा कम भल बगेको थियो।
स्मरण गराइन्छ, खरसाङ्को रिलायन्स स्मार्ट बजार नजिक रहेको भगतवीर झोड़ाको कलभर्ट वर्षाको अवधिमा थुनिएकोले यहाँबाट राष्ट्रिय राजमर्ग 110 हुँदै शहर तर्फ ठूलो भल बग्ने गरेको थियो। जसको कारण जनसाधरण, चालक, दुईचक्के सवारहरूले समस्याको सामना गर्न परिरहेका थिए। राष्ट्रिय राजमार्गमा ठूलो भल बगेपछि सड़क धेरै ठाउँमा भत्किएको अवस्थामा रहेको छ। यस स्थानबाट सड़कमा भल बग्ने समस्याबाट दिक्क बनेर धेरै मानिसहरूले आफन्ाो गुनासो सामाजिक सञ्जालहरूमा गरिरहेका थिए भने यो समस्यालाई हिमालय दर्पणले तथ्यहरूको साथमा अघिबाटै केही पटक उठाएको थियो। सड़क, बाटो र गल्लीमा वर्षाको ठूलो भल बग्ने समस्या शहरको अन्य स्थानहरूमा पनि यथावत रहेको छ। यी स्थानहरूको समस्या पनि आगामी दिनमा समाधान गरिनेछ भन्ने जनसाधरणले आशा राखेका छन्।
