टेलर स्विफ्ट–ट्राभिस केल्से वैवाहिक बन्धनमा

टेलर स्विफ्ट र ट्राभिस केल्से वैवाहिक बन्धनमा बाँधिए, म्याडिसन स्क्वायर गार्डेनमा भव्य समारोह विश्वप्रसिद्ध पप गायिका टेलर स्विफ्ट र अमेरिकी फुटबल (एनएफएल) स्टार ट्राभिस केल्से वैवाहिक बन्धनमा बाँधिएका छन्। दुवैले शुक्रबार न्यूयोर्कस्थित म्याडिसन स्क्वायर गार्डेनमा आयोजित भव्य तथा गोप्य समारोहमा विवाह गरेका हुन्। स्विफ्टका प्रवक्ताले विवाह सम्पन्न भएको पुष्टि गरेका छन्। करिब एक हजार पाहुना सहभागी भएको विवाह समारोहमा हलिउड, सङ्गीत, खेलकुद तथा व्यापार क्षेत्रका चर्चित व्यक्तित्वहरूको उपस्थिति रहेको थियो। अभिनेता एडम स्यान्डलरले विवाह सम्पन्न गराएका थिए। समारोहपछि म्याडिसन स्क्वायर गार्डेन बाहिरको डिजिटल बोर्डमा “JUST&T MARRIED” सन्देश प्रदर्शन गरिएको थियो भने एम्पायर स्टेट बिल्डिङलाई निलो बत्तीले सजाएर नवविवाहित जोडीलाई सम्मान व्यक्त गरिएको थियो। विवाहमा परम्पराअनुसार ब्राइड्समेड वा ग्रुम्समेन राखिएको थिएन। स्विफ्टका भाइ अस्टिन स्विफ्टले ‘म्यान अफ अनर’को भूमिका निर्वाह गरेका थिए भने केल्सेका दाजु जेसन केल्से ‘बेस्ट म्यान’ बनेका थिए। दुवैले क्रिश्चियन डियोर हाउट कउचरद्वारा डिजाइन गरिएका विशेष पोशाक लगाएका थिए भने स्विफ्टले कार्टियरका गहना र क्रिश्चियन लुबुटिनका विशेष जुत्ता लगाएकी थिइन्। समारोहलाई पूर्ण रूपमा गोप्य राख्न कडा सुरक्षा व्यवस्था अपनाइएको थियो। पाहुनाहरूलाई मोबाइल फोन लैजान निषेध गरिएको थियो भने निमन्त्रणासँगै गोपनीयता सम्झौता (एनडीए) मा हस्ताक्षर गराइएको थियो। विवाहस्थल बाहिर हजारौं प्रशंसकहरू गर्मीको बेवास्ता गर्दै जोडीको एक झलक पाउने आशामा भेला भएका थिए। टेलर स्विफ्ट र ट्राभिस केल्सेको सम्बन्ध सन् २०२३ मा सार्वजनिक भएको थियो। त्यसयता उनीहरू विश्व मनोरञ्जन र खेलकुद जगतका सबैभन्दा चर्चित जोडीमध्ये एक मानिँदै आएका थिए। केही महिनाअघि उनीहरूको इन्गेजमेन्ट सार्वजनिक भएपछि विवाहबारे व्यापक चर्चा सुरु भएको थियो। यो विवाहलाई अमेरिकी मनोरञ्जन जगतकै सबैभन्दा चर्चित समारोहमध्ये एकका रूपमा हेरिएको छ। भव्य आयोजना, कडा सुरक्षा, चर्चित पाहुना र गोपनीय व्यवस्थापनका कारण यसले विश्वभरका सञ्चारमाध्यम र सामाजिक सञ्जालमा व्यापक चर्चा बटुलेको छ।