मोरक्को क्वार्टरफाइनलमा, सह–आयोजक क्यानडाको ऐतिहासिक यात्रा समाप्त

फिफा विश्वकप २०२६ अन्तर्गत अन्तिम १६ को प्रतिस्पर्धामा मोरक्कोले सह–आयोजक क्यानडालाई ३–० ले पराजित गर्दै लगातार दोस्रो पटक विश्वकपको क्वार्टरफाइनलमा स्थान बनाएको छ। ह्युस्टनमा शनिबार सम्पन्न खेलको पहिलो हाफ गोलरहित बराबरीमा सकिएको थियो। सुरुआती समयमा क्यानडाले दबाब बनाए पनि दोस्रो हाफमा मोरक्कोले उत्कृष्ट पुनरागमन गर्दै खेल आफ्नो पक्षमा पार्यो। ५०औँ मिनेटमा अचराफ हाकिमीको फ्रिकिक पासमा अजेद्दिन ओउनाहीले बक्सबाहिरबाट आकर्षक प्रहार गर्दै मोरक्कोलाई अग्रता दिलाए। त्यसपछि ८२औँ मिनेटमा ब्राहिम डियाजको पासमा ओउनाहीले व्यक्तिगत दोस्रो तथा टोलीका लागि दोस्रो गोल गरे। इन्जुरी समयमा वैकल्पिक खेलाडी सुफियान रहिमीले अर्को गोल थपेपछि मोरक्कोले ३–० को सहज जित दर्ता गर्यो।क्यानडाले खेलभर केही राम्रा अवसर सिर्जना गरे पनि मोरक्कोका गोलरक्षक यासिन बुनुले उत्कृष्ट बचाउ गर्दै विपक्षीलाई गोल गर्न दिएनन्। स्टार खेलाडी अल्फोन्सो डेभिस चोटका कारण खेल्न नसक्दा क्यानडाको आक्रमण कमजोर देखिएको थियो। यस जितसँगै मोरक्को विश्वकप इतिहासमा एकभन्दा बढी पटक क्वार्टरफाइनल पुग्ने पहिलो अफ्रिकी राष्ट्र बनेको छ। अब मोरक्कोले क्वार्टरफाइनलमा फ्रान्ससँग प्रतिस्पर्धा गर्नेछ।पराजित क्यानडाको भने ऐतिहासिक विश्वकप यात्रा अन्त्य भएको छ। सह–आयोजक राष्ट्र क्यानडाले यस संस्करणमा पहिलो पटक नकआउट चरणको जितसहित उल्लेखनीय प्रदर्शन गर्दै अन्तिम १६ सम्मको यात्रा तय गरेको थियो।