नेपाली साहित्य प्रतिष्ठान डुवर्सको आयोजनामा अलिपुरद्वार जिल्लाअन्तर्गत जयगाउँस्थित तुर्सा टीजी प्राइमरी स्कुल परिसरमा रहेको कवि हरिभक्त कटुवालको पूर्णकदको सालिक प्राङ्गणमा बिहीबार ९१औँ जन्मजयन्ती श्रद्धापूर्वक मनाइएको छ। प्रतिष्ठानको पहलमा निर्माण गरिएको कवि कटुवालको सालिकमा माल्यार्पण, धूप–दीप प्रज्वलन तथा पुष्पाञ्जलि अर्पण गरी उनको साहित्यिक योगदानको स्मरण गरिएको थियो। कार्यक्रममा सहभागीहरूले सालिक परिसरको सरसफाइ तथा रङरोगनसमेत गरेका थिए।
कार्यक्रमलाई सम्बोधन गर्दै नेपाली साहित्य प्रतिष्ठान डुवर्सका अध्यक्ष कमल शर्माले भारतीय नेपाली साहित्यमा कवि हरिभक्त कटुवालले पुर्याएको साहित्यिक, सामाजिक, सांस्कृतिक तथा भाषिक योगदानको सम्मानस्वरूप प्रतिष्ठानले उनको पूर्णकदको सालिक निर्माण गरेको बताए। उनले प्रत्येक वर्ष जन्मजयन्तीका अवसरमा कटुवालप्रति श्रद्धाञ्जलि अर्पण गर्दै आएको उल्लेख गर्दै यस वर्ष पनि विधिवत् रूपमा धूप–दीप, माल्यार्पण र श्रद्धासुमन अर्पण गरी सम्मान गरिएको जानकारी दिए।
अध्यक्ष शर्माले निकट भविष्यमा आदिकवि भानुभक्त आचार्यको जन्मजयन्तीका अवसरमा हरिभक्त कटुवाललाई समेत स्मरण गर्दै विशेष साहित्यिक कार्यक्रम आयोजना गरिने बताए। कार्यक्रममा समाजसेवी ललित कोइराला, नेपाली साहित्य प्रतिष्ठान डुवर्सका महासचिव दुर्गा राई चामलिङ, कोषाध्यक्ष उत्तम भुजेल, प्रीतम क्षेत्रीलगायत प्रतिष्ठानका पदाधिकारी, साहित्यप्रेमी तथा स्थानीय गाउँलेहरूको उल्लेखनीय उपस्थिति रहेको थियो।
यता सिलगढीमा कवि तथा गीतकार हरिभक्त कटुवालको प्रतिमा स्थापित भएको छैन। यद्यपि यहाँ सञ्चारकर्मी रुबेन गुरूङद्वारा सन् 1986 मा हरिभक्त कटुवाल राष्ट्रिय प्रतिष्ठान संस्थापित भएको छ। यसका संरक्षक केके कटुवाल र सचिव कृष्ण गुरूङको नेतृत्वमा प्रति वर्ष सिलगढीका विभिन्न भवनमा कटुवाल जयन्ती, पुण्यिथि र अरू कार्यक्रम आयोजन गर्दै आएको थियो। तर दुःखको कुरा यो संस्थानका अध्यक्ष साहित्य अकादमी पुरस्कार विजेता लोकनाथ चापागाईंको गत 26 जून, शुक्रबार दिवङ्गत हुनु भयो। यसैले उनको शोक पालन गर्दै कटुवाल जयन्ती पालन गरेन।
