होलान्डको निर्णायक गोलमा नर्वे अन्तिम१६मा,आइभोरी कोस्ट२-१ले हारयो

स्टार फरवार्ड एर्लिङ हालान्डले खेलको अन्तिम समयमा गरेको निर्णायक गोलको मद्दतमा नर्वेले आइभोरी कोस्टलाई २–१ ले पराजित गर्दै सन् २०२६ को फिफा विश्वकप फुटबलको अन्तिम १६ मा स्थान सुरक्षित गरेको छ। निकै प्रतिस्पर्धात्मक बनेको राउन्ड अफ ३२ अन्तर्गतको खेलमा नर्वेले अन्तिम क्षणसम्म धैर्यता कायम राख्दै महत्वपूर्ण जित हात पारेको हो। खेलको सुरुआतदेखि नै दुवै टोलीले आक्रामक शैली अपनाएका थिए। पहिलो हाफको २७औँ मिनेटमा एन्टोनियो नुसाले उत्कृष्ट व्यक्तिगत कौशल प्रदर्शन गर्दै गोल गरेपछि नर्वेले १–० को अग्रता बनाएको थियो। त्यसपछि आइभोरी कोस्टले बराबरी गोलका लागि लगातार अवसर सिर्जना गरे पनि पहिलो हाफमा सफलता हात पार्न सकेन। दोस्रो हाफमा थप आक्रामक बनेको आइभोरी कोस्टले ७४औँ मिनेटमा वैकल्पिक खेलाडी अमाद डियाल्लोमार्फत बराबरी गोल फर्कायो। डियाल्लोको गोलसँगै खेल १–१ को अवस्थामा पुगेपछि अतिरिक्त समयमा पुग्ने अनुमान गरिएको थियो। तर खेलको ८६औँ मिनेटमा कप्तान तथा स्टार स्ट्राइकर एर्लिङ हालान्डले अवसरलाई सदुपयोग गर्दै निर्णायक गोल गरे। हालान्डको गोलसँगै नर्वेले २–१ को अग्रता बनायो, जुन अन्तिमसम्म कायम रहँदा टोलीले अन्तिम १६ मा स्थान सुरक्षित गर्न सफल भयो। खेलभरि आइभोरी कोस्टले बल नियन्त्रणमा केही हदसम्म पकड बनाए पनि नर्वेको अनुशासित रक्षापङ्क्ति र प्रभावकारी प्रतिआक्रमणका कारण बराबरीपछि खेल आफ्नो पक्षमा पार्न सकेन। हालान्डले प्रतियोगितामा आफ्नो पाँचौँ गोल गर्दै टोलीको जितमा फेरि एकपटक निर्णायक भूमिका निर्वाह गरे यस जितसँगै नर्वेले अन्तिम १६ मा स्थान बनाएको छ। अब नर्वेले क्वार्टरफाइनल प्रवेशका लागि पाँच पटकको विश्वविजेता ब्राजिलसँग प्रतिस्पर्धा गर्नेछ। पराजित आइभोरी कोस्ट भने राउन्ड अफ ३२ बाटै प्रतियोगिताबाट बाहिरिएको छ।