सामाजिक तथा मानवीय सेवामा अग्रणी संस्था “हाम्रो स्वाभिमान ट्रस्ट”ले दिल्ली सरकारद्वारा सञ्चालित “यमुना सफाई अभियान” अन्तर्गत आरएसएस पर्यावरण मोर्चासँग सहकार्य गर्दै सक्रिय सहभागिता जनाएको छ। यस अवसरमा दिल्लीस्थित यमुना नदीको पवित्र तट राम घाटमा ट्रस्टको सम्पूर्ण टोलीले सामूहिक रूपमा बृहत् सरसफाइ कार्यक्रम सम्पन्न गरेको हो।
नदी किनारको स्वच्छता तथा वातावरण संरक्षणप्रति आफ्नो सामाजिक उत्तरदायित्व निर्वाह गर्दै ट्रस्टका पदाधिकारी, सदस्य तथा स्वयम्सेवकहरू बिहानैदेखि उत्साहपूर्वक सरसफाइ अभियानमा जुटेका थिए। अभियानका क्रममा घाट क्षेत्रमा छरिएका प्लास्टिकजन्य फोहोर, पुराना लुगाकपडा तथा अन्य विसर्जित सामग्रीहरू संकलन गरी उचित व्यवस्थापन गरिएको थियो।
मुख्यमंत्री श्रीमती रेखा गुप्ता दिल्ली सरकारको आह्वानमा सञ्चालन गरिएको यस मेगा यमुना सफाई अभियानमा ५०० भन्दा बढी सामाजिक तथा स्वयंसेवी संस्थाहरूको सहभागिता रहेको थियो। “हाम्रो स्वाभिमान ट्रस्ट”ले पनि वातावरण संरक्षण तथा सामाजिक चेतना अभिवृद्धिमा आफ्नो प्रतिबद्धता पुनः व्यक्त गरेको छ। अभियान सफलतापूर्वक सम्पन्न भएपछि ट्रस्टका प्रमुख नेतृत्वकर्ता प्रेम क्षेत्री, श्रीमती अनिता ज्ञावली, राकेश प्रधानले पवित्र तथा महत्वपूर्ण कार्यमा आफ्नो अमूल्य समय, श्रम र सहयोग प्रदान गर्ने सम्पूर्ण स्वाभिमानी साथीहरू, सहयोगीहरू तथा स्वयम् सेवकहरूप्रति हार्दिक धन्यवाद तथा आभार व्यक्त गरेका छन्।
साथै, ट्रस्टले आगामी दिनहरूमा दिल्ली क्षेत्रमा वृक्षारोपण, वातावरण संरक्षण तथा “अपरेशन शुद्धि” लगायतका सामाजिक अभियानहरूलाई अझ व्यापक रूपमा अगाडि बढाउने प्रतिबद्धता समेत जनाएको छ।
