प्रेम सम्बन्धमा आएको विवादपछि बेंगलुरुमा सिक्किमकी २२ वर्षीया युवतीको हत्या, प्रेमी पक्राउ।

बेंगलुरुमा घरेलु विवादका क्रममा सिक्किमकी २२ वर्षीया युवतीको आफ्नै प्रेमीबाट हत्या भएको आरोप लागेको छ।मृतकको पहिचान अति हाङ्मा सुब्बाका रूपमा भएको छ। उनी बेंगलुरुको एक सैलुनमा रिसेप्सनिस्टका रूपमा कार्यरत थिइन्। घटनामा संलग्न रहेको आरोप लागेका दार्जिलिङ निवासी पूर्वा लेप्चा भने एक होटलमा वेटरको रूपमा कार्यरत थिए। प्रारम्भिक जानकारीअनुसार दुवैजना प्रेम सम्बन्धमा रहेका थिए र करिब एक महिनाअघि बेंगलुरु आएका थिए। उनीहरू डोड्डाकन्नाहल्ली क्षेत्रमा सँगै बस्दै आएका थिए। प्रहरीका अनुसार युवतीको अन्य व्यक्तिसँग सम्बन्ध रहेको आशंकामा दुवैबीच विवाद भएको थियो। विवादका क्रममा पूर्वा लेप्चाले भान्सामा प्रयोग हुने चक्कु प्रहार गर्दा अति हाङ्मा सुब्बाको घटनास्थलमै ज्यान गएको बताइएको छ।घटनापछि बेलन्दूर प्रहरीले मुद्दा दर्ता गर्दै अनुसन्धान सुरु गरेको छ। एनडीटीभी न्यूजका अनुसार घटनाको सम्पूर्ण विवरण र वास्तविक कारण पत्ता लगाउन प्रहरीले थप अनुसन्धान जारी राखेको छ।