म्याकगिनको गोलमा स्कटल्यान्ड विजयी, ३६ वर्षपछि विश्वकपमा ऐतिहासिक सफलता

स्कटल्यान्डको विजयी सुरुआत, हैटीलाई १–० ले हराउँदै ३६ वर्षपछि विश्वकपमा ऐतिहासिक जित।  फिफा विश्वकप २०२६ अन्तर्गत समूह ‘सी’ को आफ्नो पहिलो खेलमा स्कटल्यान्डले हैटीलाई १–० ले पराजित गर्दै ३६ वर्षपछि विश्वकपमा ऐतिहासिक जित दर्ता गरेको छ। बोस्टन स्टेडियममा सम्पन्न खेलमा जोन म्याकगिनले गरेको एकमात्र गोल नै स्कटल्यान्डको जितका लागि पर्याप्त बन्यो। खेलको २८औँ मिनेटमा चे एडम्सको प्रहारलाई हैटीका गोलरक्षक जोह्नी प्लासिदले रोके पनि फर्किएको बलमा म्याकगिनले गोल गर्दै स्कटल्यान्डलाई अग्रता दिलाएका थिए। उक्त गोल नै खेलको निर्णायक क्षण बन्यो। अग्रता लिएपछि स्कटल्यान्डले खेल नियन्त्रणमा राख्ने प्रयास गर्यो भने हैटीले बराबरी गोलका लागि लगातार दबाब सिर्जना गरिरह्यो। दोस्रो हाफमा हैटीले केही उत्कृष्ट अवसर पाए पनि त्यसलाई गोलमा परिणत गर्न सकेन। विशेषगरी फ्रान्ट्जडी पिएरोटको अन्तिम समयमा गरिएको हेडर पोस्ट नजिकैबाट बाहिरिएपछि हैटी बराबरी गर्नबाट चुक्यो। हैटीले ५२ वर्षपछि विश्वकपमा पुनरागमन गर्दै उत्साहजनक प्रदर्शन गरे पनि अन्तिम नतिजा आफ्नो पक्षमा पार्न सकेन। प्रशिक्षक सेबास्टियन मिग्नेले हारका बाबजुद टोलीको प्रदर्शनप्रति सन्तुष्टि व्यक्त गर्दै आगामी खेलहरूमा अझ प्रभावकारी बन्नुपर्ने बताएका छन्।यस जितसँगै स्कटल्यान्ड समूह ‘सी’ को शीर्ष स्थानमा उक्लिएको छ। यसअघि सोही समूहको अर्को खेलमा ब्राजिल र मोरक्कोले १–१ को बराबरी खेलेका थिए। अब स्कटल्यान्डले आफ्नो दोस्रो खेलमा मोरक्कोसँग प्रतिस्पर्धा गर्नेछ भने हैटीले शक्तिशाली ब्राजिलको सामना गर्नेछ।