भारतको पहाडी भू–भागमा जन्मिएका गोर्खाली सन्तानहरूले देशसेवामा देखाउँदै आएको साहस, समर्पण र वीरताको अर्को उज्यालो उदाहरणका रूपमा लेफ्टिनेन्ट मधु कार्की उदाएकी छिन्।
मणिपुर राज्य अन्तर्गत काङपोक्पी जिल्लाको चारहजारे (मोटबुङ) निवासी हवल्दार यम बहादुर कार्की र श्रीमती हिमा कार्कीकी सुपुत्री मधु कार्की भारतीय सेनामा लेफ्टिनेन्ट (Nursing Officer) पदमा नियुक्त भई सम्पूर्ण देशका लागि गौरवको विषय बनेकी छिन्। सन् २०२२ मा ‘मिलिटरी नर्सिङ सर्भिस (MNS)’ मा छनोट भएकी मधुले आफ्नो लक्ष्यप्रति दृढ रहँदै कोलकातास्थित कमान्ड हस्पिटल, इस्टर्न कमान्डमा कठोर प्रशिक्षण पूरा गरिन्।
निरन्तर मिहिनेत, अनुशासन र आत्मविश्वासको बलमा उनले आज यो सम्मानित पद हासिल गर्न सफल भएकी हुन्। एक हवल्दार बाबुकी छोरीले अफिसरको दर्जा हासिल गर्नु केवल व्यक्तिगत सफलता मात्र नभई सम्पूर्ण गोर्खाली समुदायको गौरव हो।
विशेषगरी “Women in Uniform” का लागि मधुको उपलब्धि एक शक्तिशाली प्रेरणाको स्रोत बनेको छ। यसले स्पष्ट सन्देश दिन्छ—परिस्थिति जस्तोसुकै भए पनि दृढ इच्छाशक्ति र मेहनतले सफलता अवश्य सम्भव हुन्छ। पश्चिम बङ्गालको कालिम्पुङ लगायत भारतका पहाडी क्षेत्रहरूमा बसोबास गर्नेसमुदायका लागि मधुको सफलता नयाँ ऊर्जा र आशाको किरण बनेको छ। उहाँको उपलब्धिले युवापुस्तालाई देशसेवामा लाग्न प्रेरित गर्नुका साथै नारी सशक्तीकरणको मार्ग अझ मजबुत बनाएको छ।
