मिरिक फ्लोरी कल्चर सोसाइटीको आयोजनामा आगामी 28 फरवरीदेखि २ मार्च २०२६ सम्म मिरिकमा तीन दिवसीय पुष्प प्रदर्शनी आयोजना हुने भएको छ। उक्त पुष्प प्रदर्शनी मिरिक एकोरिएम परिसरमा सञ्चालन हुने मिरिक फ्लोरी कल्चर सोसाइटीले जनाएको छ।
यस सम्बन्धमा प्रेस भेलामार्फत सोसाइटीद्वारा जानकारी दिइएको छ। प्रेस भेलामा सोसाइटीका अध्यक्ष बी. के. राई, उपाध्यक्ष विराज राई, सचिव धिरज राई, कोषाध्यक्ष राजेन राई तथा संयुक्त सचिव आनन्द राईको उपस्थिति रहेको थियो।
प्रदर्शनीमा विशेष गरी अर्किड सिम्बिडियमका विभिन्न नयाँ–नयाँ भेराइटीका फूलहरू, मौसमी फूलहरू लगायत आकर्षक पुष्पहरू प्रदर्शन गरिने जानकारी दिइएको छ। साथै प्रदर्शनी स्थलमै फूलहरूको खुला बिक्री समेत गरिने सोसाइटीले जनाएको छ।
यसैगरी, जिल्लाभरिका फूल खेती गर्ने किसान तथा व्यवसायीहरूलाई आफ्नो फूल बिक्री गर्न सहज होस् भन्ने उद्देश्यले स्टलहरूको व्यवस्था पनि गरिने बताइएको छ। फूल बिक्रीका लागि स्टल लिन इच्छुक व्यक्तिहरूले मिरिक फ्लोरी कल्चर सोसाइटीसँग सम्पर्क गर्न सोसाइटीले आग्रह गरेको छ।
पुष्प प्रदर्शनीले मिरिकको पर्यटन प्रवर्द्धनसँगै स्थानीय फूल व्यवसायलाई थप प्रोत्साहन पुग्ने अपेक्षा गरिएको छ।
