दार्जीलिङ, 5 फरवरी(निसं): मगलबार राती लागेको अचानक आगलागीमा परेर जोरबङ्गलो-सुकिया पोखरी खण्डको लिङ्गिया-मेरीबोङ ग्राम पञ्चायत अन्तर्गत वार्ड नम्बर दुइको लम्बा धुरामा दुईवटा घर जलेर खरानी भएको खबर प्रकाशमा आएको छ। रातीको लगभग नौ बजीतिर लागेको भीषण आगलागीमा स्थानीय राफिस दर्नाल तथा आदित्य थापाको घर जलेर पुर्ण खरानी भएको स्थानीय वार्ड सदस्य निमेष सुब्बाले जानकारी गराएका छन्। उनका अनुसार, आगलागी भएको थाहा पाउदासम्म आगोले विकराल रूपमा लिइसकेको तथा स्थानीय गाउँवासीहरु सहयोगमा आगोलाई नियन्त्रणमा ल्याउदै अन्यत्र फैलनुबाट जोगाउन सफल भएको भए पनि दुईवटा घर बचाउन नसकिएको बताइएको छ। अर्कोतिर घटनाको खबर पाउनसाथमा क्षेत्रीय सभासद सन्दिप छेत्रीले स्थलगत भ्रमण गरि आवस्यक जानकारी लिँदै घटनाबारेमा सम्बन्धित विभाग तथा जीटीए प्रशासनसामु जानकारी गराइसकेको बताइएको छ। यसका साथमा उनले हुनसक्ने सहयोग गर्न तत्पर रहेको बताएका छन्। घटनाको वास्तविक कारण थाहा नलागेको तथा संबंधित विभागले अनुसन्धान शुरु गरिएको थाहा लागेको छ। यस्तै घटनाको पुर्ण बिवरण वार्ड सदस्य निमेष सुब्बाले ग्राम पन्चायत कार्यलय अनि खण्ड विकास कार्यलय लगायत सम्बन्धित निकायलाई दिदै चाडो पुनर्वास व्यवस्थापन गरिनुपर्ने माग समेत गरेका छन् ।
