दार्जीलिङ, 1 फरवरी (निसं): सिक्किम सीमामा अवैध रक्सी तस्करी विरुद्ध कडा कारबाही, नक्कली मदिराले जनस्वास्थ्यमा गम्भीर खतरा दार्जीलिङ जिल्लामा अवैध रक्सी तस्करी र नक्कली मदिरा उत्पादन विरुद्ध प्रशासनले व्यापक र कडा कारबाही गरिने अभियान सुरु गरेकोछ। यसै क्रममा दार्जीलिङ आबकारी विभाग र दार्जीलिङ पुलिसको संयुक्त अभियानमा सिक्किम–बंगाल सीमावर्ती सिङ्गला सहित विभिन्न संवेदनशील क्षेत्रमा निरन्तर नाका जाँच अभियान सञ्चालन भइरहेको छ।
स्पेशल एक्साइज कमिश्नर (एनफोर्समेन्ट नर्थ) सुजीत दासका अनुसार सिक्किमबाट गैर-ड्युटी रक्सी बङगालमा भित्राएर अवैध रूपमा बिक्री गरिँदै आएको छ, जसका कारण राज्य सरकारलाई ठूलो राजस्व नोक्सानी भइरहेकोछ। साथै सिक्किमको लेबल प्रयोग गरी साना अवैध कारखानामा नक्कली रक्सी उत्पादन गरिँदै आएको तथ्य पनि सार्वजनिक भएको छ। जुन जनस्वास्थ्यका लागि गम्भीर र ज्यानै जोखिममा पार्ने खतरा हो।
अवैध कारोबार नियन्त्रण गर्न पछिल्ला दुई महिनादेखि कालेबुङ रङ्फू प्रहरी आउटपोस्ट र मनसोंगसम्म कडा नाका जाँच जारी राखिएको छ। हालै सरण्य बारिक, डिप्टी एक्साइज कलेक्टर सदरको नेतृत्वमा तीनवटा सवारी साधनबाट गैर-ड्युटी रक्सी जफत गरी अभियुक्तहरूलाई अदालतमा उपस्थित गराइएको छ।
सुपरिन्टेन्डेन्ट अफ एक्साइज गौतम पाख्रीनले जिलाधिकारीको निर्देशन अनुसार सिक्किमबाट दार्जीलिङ, खरसाङ हुँदै बिहारसम्म फैलिएको तस्करी सञ्जालमाथि कठोर कारबाही भइरहेको जानकारी दिए। प्रशासनले सर्वसाधारणलाई सरकारी मान्यताप्राप्त पसलबाट मात्र मदिरा खरिद गर्न आग्रह गर्दै सस्तो र अवैध मदिराबाट टाढा रहन अपिल गरेको छ, किनकि यस्तो मदिरा सेवन प्राणघातक प्रमाण हुनसक्छ।
अवैध मदिरा तस्करी केवल कानुनी अपराध मात्र होइन, यसले जनस्वास्थ्य, राज्यको राजस्व र सामाजिक सुरक्षामा गम्भीर चुनौती खडा गरिरहेको छ। प्रशासनले सीमावर्ती क्षेत्रमा निगरानी अझ कडा बनाउँदै दोषीमाथि शून्य सहनशीलताको नीति अपनाएको स्पष्ट पारेको विभागीय अधिकारीको भनाइ छ।
