एजेन्सी संयुक्त राज्य अमेरिकाले भेनेजुएलाको पेट्रोलियम पदार्थ ढुवानी गर्ने थप छवटा पानीजहाजमाथि प्रतिबन्ध लगाएको छ। यो कदम भेनेजुएलाको एक ट्याङ्करलाई अमेरिकी नियन्त्रणमा लिएको केही दिनपछि आएको हो, जसले दुई राष्ट्रबीचको तनाव थप बढाएको छ।
अमेरिकी अधिकारीहरूका अनुसार, यसअघि बिहीबार भेनेजुएलाको समुद्री तटबाट कब्जा गरिएको तेलको ट्याङ्करलाई अमेरिकी बन्दरगाहमा ल्याउने तयारी भइरहेको ह्वाइट हाउसकी प्रवक्ता कारोलिन लियभिट्टले पुष्टि गरेकी छिन्।
अमेरिकाले भेनेजुएलाका राष्ट्रपति निकोलास मदुरोको शासनलाई ‘अवैध सत्ता’ भन्दै आएको छ। पछिल्लो प्रतिबन्धको सूचीमा राष्ट्रपति मदुरोसँग निकट सम्बन्ध राख्ने केही व्यक्तिहरूलाई पनि समावेश गरिएको छ।
यता, भेनेजुएला सरकारले भने अमेरिकाको यस कार्यको कडा निन्दा गरेको छ। भेनेजुएलाले अमेरिकी कारबाहीलाई ‘अन्तर्राष्ट्रिय डकैती’ को संज्ञा दिँदै अस्वीकार गरेको छ।
अमेरिकाले भेनेजुएलामाथि अवैध लागूऔषध कारोबारमा संलग्नहरूलाई संरक्षण दिएको र विगतमा लेबनानको सैन्य समूह हिजबुल्लाहसँग सहकार्य गरेको जस्ता गम्भीर आरोपहरू लगाउँदै आएको छ। सोही आरोपका कारण अमेरिकाले यसअघि भेनेजुएला हुँदै आउने शंकास्पद डुङ्गाहरूमाथि प्रहार गर्ने गरेको र त्यस क्रममा ठूलो संख्यामा मानिसहरूले ज्यान गुमाएका खबरहरू छन्।
यस पछिल्लो घटनाक्रमले वाशिङ्टन र काराकासबीचको सम्बन्धमा थप जटिलता ल्याउने निश्चित भएको छ।
