जीटीए स्तरीय प्रश्नोत्तरी प्रतियोगिताका विद्यार्थीहरूलाई सम्मान

बिजनबारी, 21 नोभेम्बर(निसं): आज पुल बिजनबारी क्षेत्रीय कार्यालयको प्रेक्षागृहमा कार्यालयको पक्षबाट जीटीए स्तरीय प्रश्नोत्तरी प्रतियोगितामा दोस्रो हुने विद्यार्थीहरूलाई सम्मान गरियो। सर्कल एआई दीपशिखा लामा, एसआई उत्तम रोय, सभासद सन्दिप छेत्री, डीएसबी सदस्य पहलमान तामाङ अनि शिक्षक- शिक्षिका एवं अभिभावकहरू उपस्थित थिए। कार्यालयका कर्मचारी मिलन छेत्रीद्वारा संचालित कार्यक्रममा विद्यार्थीहरूलाई खादा अर्पण गरि सम्मान जनाउँदै प्रतियोगितामा जितेको नगद पुरस्कारबाट पाँच-पाँच हजार रुपियाँ प्रदान गरियो। यसदिन एआई दीपशिखा लामाले विद्यार्थीहरु विजयी हुनुमा शिक्षक-शिक्षिका लगायत विद्यार्थी अनि अभिभावकहरुको ठुलो योगदान रहेको जनाइन्। यसरी नै डीएसबी सदस्य पहलमानले यस वर्षको प्रश्नोत्तरी प्रतियोगितामा नानीहरू विजयी हुनुमा कार्यकारी सभासद सतिश पोखरेल अनि सभासद सन्दिप छेत्रीको ठुलो योगदान रहेको अवगत गराए। यसका साथै तामाङले प्रश्नोत्तरी प्रतियोगिता आयोजनाको निम्ति प्राथमिक शिक्षा विभाग सभासद राजेश चौहान अनि जीटीए प्रमुख कार्यपाल अनित थापा प्रति पनि हार्दिक आभार प्रकट गरे। सभासद सन्दिप छेत्रीले यो विजय पुल-बिजनबारी क्षेत्रको विजय हो भनी जनाए भने आगामी वर्ष अझ सफलताको पहिलो शिखरमा पुग्नु पर्छ भन्ने सुझाव पनि दिए।