गोर्खाल्याण्ड गठनको निम्ति समग्र भारतीय गोर्खाहरुमाझ वैचारिक एकता ल्याउने प्रयासमा लागिपरेका गोर्खाल्याण्ड एक्टिभिष्ट समूहका तीन सदस्यीय टोलीले मणिपुर राज्यका काङ्लातुम्बी अनि इम्फालका सचेत गोर्खा सन्तानहरुसँग भेट गरेर गोर्खाल्याण्ड गठन विषयमा गहन विचार विमर्श गरेको थियो। उत्तर पूर्वी राज्यहरुको भ्रमणमा रहेको गोएस टोलीको यो दोस्रो दिनको भ्रमणमा पनि काङ्लातुम्बी अनि आईजलका गोर्खाहरुबाट सकारात्मक प्रतिक्रिया पाएको छ। गोर्खाल्याण्ड भारतीय गोर्खाहरुको राजनैतिक सुरक्षाको निम्ति एकदमै आवश्यक रहेको मणिपुरका गोर्खाहरुले पनि अनुभव गरेको बताउँदै गोर्खाल्याण्ड राज्य गठनको निम्ति गोएसको वैचारिक सिद्धान्तका कुराहरु बुझ्ने प्रयास गरे। आफुहरु माथि राजनैतिक सङ्कट आइपर्दा आवाज उठाइदिने कोही नहुने र आफुहरु टुहुरो जस्तो अनुभव गर्न परेको अनि वर्तमानभन्दा पनि भविष्य झनै सङ्कटमा देखिन्दै गएकोले पुस्तौं-पुस्तादेखि यहाँ बस्दै आएका धेरै जसो गोर्खा सन्तानहरु राजनैतिक सुरक्षा खोज्दै आफुहरुलाई सुरक्षित लाग्ने ठाउँहरुतिर पलायन भएर गइसकेको उनीहरुले बताए। राजनैतिक सुरक्षाको निम्ति यो पलायनको क्रम अझै पनि चलिरहेकोले मणिपुरमा गोर्खाहरुको अस्तित्व अझै सङ्कटमा पर्ने डरले उनीहरूलाई सताइरहेको बताए। यस्तो अवस्थामा यदि अलग राज्य गोर्खाल्याण्ड गठन गर्न सके यस्तो सङ्कट, भय एवम् त्रासबाट मुक्त हुन सकिने र आफुहरु राजनैतिक रुपले सुरक्षित बन्ने मनतब्य पोख्दै गोएसको पहललाई स्वागत जनाए।
