बाईपास रोड पुनः खोलिन लगभग एक महिला लाग्ने

खरसाङ, (निसं)ः सड़क क्षतिग्रस्त बनेकोले बन्द राखिएको कप्तान सुरज शर्मा पथमा यान-वाहनको चलाचल पुनः आरम्भ हुनलाई लगभग एक महिला जति समय लाग्ने देखिएको छ। मंगलवारदेखि यो सड़कको मरमत कार्य आरम्भ भइसकेको छ। यो सड़कमा रहेको कलभर्टको देवाल वर्षाको भलले बगाएर भत्काएको थियो भने सड़क मुनि रहेको कलभर्टको दुईतिरको जमिन वर्षाको भलले काटिदिएकोले सड़कमा भ्वाँङ परेको थियो अनि सड़क पनि दबिएको अवस्थामा थियो। सड़क मरमत कार्य आरम्भ गरिएपछि अहिलेसम्म कलभर्ट रहेको सड़कलाई पूर्ण रुपले भत्काउने कार्य भइसकेको छ। वर्षाको समयमा पनि सड़क मरमतको निम्ति कार्य भइरहेको छ। कलभर्टको भत्किएको देवाल खनेर निकाल्न पर्ने अनि त्यसपछि कलभर्टको सतह निर्माण गरेर कलभर्टको दुवै तर्फ देवाल लगाएर सड़क सतहमा ढलाई गर्न पर्ने भएकोले मरमतको कार्य समाप्त हुनलाई निकै समय लाग्ने देखिएको छ। यस बारेमा कलभर्ट मरमतको कार्य स्थलमा रहेका ठेकेदार रवीन तामाङले बताए अनुसार कलभर्टको दुवै तर्फको देवाल भत्काएर, सतह तयार गरेर, दुवै तर्फ देवाल लगाउन पर्ने, देवालको काम सकिएपछि सड़क सतहमा ढलाई गर्न पर्ने र उक्त ढलाई गाढ़ी चलाचलको निम्ति तयार हुनलाई निकै समय लाग्ने बताए। स्मरण गराइन्छ, खरसाङ बजारमा यातायात बाग्लो चलाचल भएको अवधिमा दार्जीलिबाट सिलगढ़ी जाने प्रत्येक गाड़ीलाई यो बाटो भएर सिलगढ़ी पठाइन्थ्यो। वर्तमानमा यो बाटो बन्द रहेकोले दार्जीलिङदेखि सिलगढ़ी जाने प्रत्येक गाड़ी खरसाङ बजार पसेर कुदिरहेका छन्‌‍। खरसाङ्को कतिपय स्थानीय सेण्डिकेटका गाड़ीहरू, विद्यार्थी बोक्ने गाड़ीहरू पनि यसै बाटो भएर कुद्ने गरेका थिए। यी सबै गाड़ी वर्तमानमा खरसाङ बजार भएर कुदिरहेकाले खरसाङ बजारको राष्ट्रिय राजमार्गमा यान-वाहनको चलाचलमा व्यापक वृद्धि भएको छ, जसको कारण गाड़ी जामको स्थिति सृजना भइरहेको छ।