दार्जीलिङ, 5 मई (निसं): दार्जीलिङ विधानसभा आसनबाट पराजित बनेपछि भागोप्रमोका उम्मेद्वार विजय कुमार राईले भाजपाबाट दार्जीलिङ पहाड़को लागि अब अवश्यै कुनै ठोस कार्य हुने आशा व्यक्त गरेका छन्। उनले दार्जीलिङ विधानसभा आसनबाट विजय बनेका भाजपा उम्मेद्वार नोमन राईलाई बधाई दिँदै लोकतान्त्रिक प्रक्रियामा हार र जीत हुने कुरा गरे। उनले भने-यस चुनाउमा मेरो केही मतान्तरले मात्रै हार भएको छ। यद्यपि, यस चुनाउमा जीत हासिल गर्ने उम्मेद्वारले दार्जीलिङका जनतालाई जुन आशा देखाएका थिए, त्यो पूरा गर्छन् भन्ने आशा गरेको छु। उनले जनताको निर्णयलाई शिरोपर राखेको बताउँदै जित्दा रमाउनु र हार्दा निराश हुने कुरामा आफू नपर्ने पनि बताए। दार्जीलिङ शहरी क्षेत्रको मतगणना शुरू भएपछि उनलाई प्राप्त भइरहेको मत कम्ति हुँदै गएको सम्बन्धमा प्रश्न गर्दा राईले भने-यसप्रकारको मत परिणाम यसपालिको चुनाउमा मात्रै होइन। लगभग 40 वर्षदेखि नै पहाड़मा जुन शक्तिशाली पार्टी थियो, त्यस पार्टीलाई दार्जीलिङ शहरी क्षेत्रका जनताले भोट नदिएको उदाहरणहरू छन्। यसैले यसपालि भारतीय गोर्खा प्रजातान्त्रिक मोर्चाले शहरी क्षेत्रमा भोट कम्ति पाउँदा उदेक मान्ने कुनै कुरा नै छैन। स्मरण गराइन्छ, दार्जीलिङ विधानसभा चुनाउको परिणामअनुसार, भाजपाका उम्मेद्वार नोमन राईले भागोप्रमो उम्मेद्वार विजय कुमार राईलाई पराजित गरेका छन्।
