भारत–भुटान सीमावर्ती क्षेत्रमा वन्यजन्तु तस्करी गर्ने प्रयास असफल

दार्जीलिङ वन्यजन्तु विभागअन्तर्गतको सुकना रेञ्ज, डब्लुसिसिबी (WCCB) सीमावर्ती इकाई सिलगडी तथा जलदापारा आरआरटी रेञ्जको संयुक्त अभियानमा कालचिनी थाना अन्तर्गत दक्षिण साताली क्षेत्रमा एक मोटरसाइकललाई रोकी जाँच गर्दा करिब ९०० ग्राम हात्तीको दाँत (आइभोरी) र साम्बर मृगको सिङ बरामद गरिएको छ। गोप्य सूचनाको आधारमा सञ्चालन गरिएको उक्त अभियानका क्रममा वन्यजन्तुजन्य सामग्रीसहित मोटरसाइकलमा सवार दुई व्यक्तिलाई नियन्त्रणमा लिइएको थियो। घटनामा संलग्न अलीपुरद्वारका ती दुई जनालाई पक्राउ गरी अलीपुरद्वार अदालतमा पेश गरिएको थियो। अदालतले दुवै आरोपितलाई न्यायिक हिरासतमा पठाएको छ। प्रारम्भिक अनुसन्धान अनुसार बरामद वन्यजन्तुजन्य सामग्री असमबाट ल्याइएको र भारत–भुटान सीमावर्ती क्षेत्र जयगाउँतर्फ अवैध बिक्री तथा तस्करीका उद्देश्यले लैजाँदै गरिएको अवस्थामा पक्राउ गरिएको हो। वन विभागका अधिकारीहरूले यस घटनाको अन्तरराज्यीय तस्करी सञ्जालसँग सम्बन्ध हुन सक्ने आशंका व्यक्त गर्दै थप अनुसन्धान अगाडि बढाइरहेका छन्। वन्यजन्तु तथा दुर्लभ जीवजन्तुका अंगहरूको अवैध कारोबार रोक्न सम्बन्धित निकायहरूले निरन्तर निगरानी र अभियान सञ्चालन गर्दै आएका छन्। वन्यजन्तु अपराध नियन्त्रणतर्फको यो कारबाहीलाई महत्वपूर्ण सफलताका रूपमा हेरिएको छ भने यसले सीमावर्ती क्षेत्रमा सक्रिय तस्करहरूविरुद्ध कडा सन्देश दिएको छ।