पश्चिम सिक्किमको तिक्जेक भिर क्षेत्रमा गएराति भएको दर्दनाक सडक दुर्घटनामा तीन जनाको दुःखद निधन भएको छ। जिल्ला प्रहरी कार्यालयका अनुसार फरवरी २८ को राति करिब ११:०० बजे देन्तामबाट गेजिङ तर्फ घर निर्माण सामग्री बोकेर आउँदै गरेको टिप्पर ट्रक (दर्ता नं. SK 02D 1173) अनियन्त्रित भई करिब ३०० फिट तल भीरबाट खसेको थियो।
दुर्घटनामा गाडी चालक सल्ले, गेजिङ निवासी ४० वर्षीय प्रदीप छेत्री, साथै लिङ्चोम निवासी १८ वर्षीय नागेन्द्र गुरुङ र दरापको सिन्ड्राबोङ निवासी २० वर्षीय ओन्छेन भुटियाको ज्यान गएको प्रहरीले जनाएको छ।
घटनापछि रातिको ड्युटीमा रहेका प्रहरी टोलीले घाइतेहरूलाई तत्काल जिल्ला अस्पताल, गेजिङ पुर्याएको थियो। तर उपचारको क्रममा तीनै जनालाई चिकित्सकले मृत घोषित गरेका थिए।
मृतकहरूको शव हाल अस्पतालको शवगृहमा राखिएको छ भने कानुनी प्रक्रिया अनुसार मुचुल्का तयार पार्ने कार्य भइरहेको छ। दुर्घटनाको कारणबारे प्रहरीले थप अनुसन्धान गरिरहेको जनाएको छ।
जिल्ला प्रहरी प्रमुख छिरिङ शेर्पाले घटनाको पुष्टि गर्दै आधिकारिक जानकारी प्रदान गर्नुभएको हो।
यस दुःखद घटनाप्रति गहिरो समवेदना व्यक्त गर्दै दिवंगत आत्माहरूको चिरशान्तिको कामना तथा शोकसन्तप्त परिवारजनप्रति हार्दिक समवेदना प्रकट गरिएको छ।
