खरसाङ, (मोहन प्रसाद): रेबिज मुक्त पहाड़ अभियान अन्तर्गत गत दिसम्बर महिनादेखि हजारौंँको संख्यामा कुकुरहरूलाई रेबिजको टीकाकरण गर्ने कार्य कालेबुङ क्षेत्रमा समाप्त गरेपछि दार्जीलिङ गुडविल एनिमल शेल्टरको टीमले अन्य सहयोगीहरूको साथमा गत 5 मार्चदेखि खरसाङ महकुमा क्षेत्रको विभिन्न ठाउँहरूमा रेबिजको टीकाकरण मिशिन शुरू गरेको छ।
उक्त मिशन विषयमा पत्रकारहरूसित बोल्दै, मिशनका एक सहयोगी प्रतिनिधि छोफेल तेञ्जिङले बताए अनुसार, खरसाङ स्थित तीन माइलमा जम्मा 23 वटा कुकुरलाई टीकाकरण गरियो भने यस क्षेत्रमा के-नाइन एवं एआरडीद्वारा अगावै प्रायः धेरै कुकुरको टीकाकरण भइसकेको थियो। यस टीकाकरण अभियान अन्तर्गत सन्त मेरिज क्षेत्रमा जम्मा 38 वटा कुकुरहरूलाई रेबिजको टीका लगाइयो। त्यसरी नै सिंगेल चिया बगान क्षेत्रमा मोठ 218 वटा कुकुरलाई टीकाकरण गरिएयो। तिनले थप जनाए अनुसार, खरसाङ महकुमा क्षेत्रको अन्य भागहरूमा अझ पनि टीकाकरण बाँकी रहे तापनि, बुधवारदेखि यस मिशन अन्तर्गत खरसाङ नगरपालिका क्षेत्रमा पनि टीकाकरण आरम्भ गर्दै वार्ड नम्बर 3 बाट आज शुरू भएको छ। बुधवार वार्ड नम्बर 3 मा जम्मा 42 वटा कुकुरलाई रेबिजको टीका लगाइएको छ।
तिनले थप जनाए अनुसार, खरसाङ्मा यस मिशिन संयुक्तको सहयोगमा भइरहेको छ। जसमा दार्जीलिङ गुडविल एनिमल शेल्टरका टीम सहित दार्जीलिङ एनिमल शेल्टरका पशु स्वास्थ्य सेवा प्रभारी चिकित्सक डा. शिवानी प्रधान, रेबिज मुक्त पहाड़का प्रोजेक्ट प्रबन्धक अश्विन थापा, खरसाङ क्षेत्रका इन्टीग्रेटेड बाइट केस म्यानेजमेन्ट अधिकारी प्रितेश प्रधान, पशु प्रेमी एवं पशु कल्याण माथि कार्य गर्ने गैर सरकारी संगठन के- 9 का प्रतिनिधि निशान्त थापा अनि अन्यान्यको सहयोगमा भइरहेको छ।
रेबिज रोगको रोकथाम गर्न, यो घातक रोगदेखि आफूलाई सुरक्षित राख्न, आफ्नो कुकुरलाई सुरक्षित राख्न, उक्त मिशनका टोली प्रत्येक घर-दैलोमा गएर कुकुरलाई टीकाकरण गरिरहेको, बिहीवार 12 मार्च खरसाङ नगरपालिकाको वार्ड नम्बर 2 मा टीकाकरण गरिने पनि तिनले जनाएका छन्।
