खरसाङ, (निसं)ः अप्पर मामरिङ प्राथमिक पाठशाला अनि समाज सुधार समितिको संयुक्त आयोजना तथा नेतृत्वमा आज एक बिदाइ समारोह सम्पन्न गरिएको छ। कार्यक्रममा विद्यालयमा समर्पणपूर्वक सेवा प्रदान गर्दै आएकी शिक्षिका समिता राईलाई सम्मानपूर्वक बिदाइ गरियो। कार्यक्रममा विद्यालय परिवार, अभिभावक, स्थानीय बुद्धिजीवी, समाज सुधार समितिका पदाधिकारी एचपीसी चर्चका पास्टर महेन्द्र मुखिया अनि विद्यार्थीहरूको उपस्थिति रहेको थियो। यस बिदाई समारोहको सभापतित्व एसएमसीका अध्यक्ष तारा कुमार भुजेलले गरेका थिए भने यस समारोहमा स्वागत मन्तव्य पाठशालाका प्रधानाध्यापक सुरज मुखियाले राखेका थिए।
वक्ताहरूले शिक्षिका समिता राईको अनुकरणीय सेवा, अनुशासन, शिक्षाप्रति समर्पण तथा विद्यार्थीमैत्री व्यवहारको प्रशंसा गर्दै उनको निस्वार्थ योगदानले विद्यालयलाई उल्लेखनीय प्रगति गर्न सहयोग पुगेको बताएका थिए। समारोहलाई सम्बोधन अप्पर मामरिङ प्राथमिक विद्यालयका भूतपूर्व प्रधानाध्यापक डीके छेत्री, पास्टर महेन्द्र मुखिया, समाज सुधार समितिका सचिव पेम्बा शेर्पा, चालक सङ्गठनबाट बसन्त राईले गरेका थिए।
समारोहमा विद्यालय र समितिले संयुक्त रूपमा सम्मानपत्र तथा मायाको चिनो प्रदान गर्दै शिक्षिकाको सफल भावी यात्राको लागि शुभकामना व्यक्त गरिएको थियो। बिदाई शिक्षिका समिता राईको जीवनी शिक्षिका सलिमा राईले प्रस्तुत गरेकी थिए। कार्यक्रमको सञ्चालन शिक्षिका पासाङ लकीले गरेकी थिए। समारोहलाई विद्यालयका विद्यार्थीहरूले प्रस्तुत गरेका गीत-नृत्य तथा सांस्कृतिक कार्यक्रमले आकर्षक बनाएको थियो। समारोहमा शिक्षिका तृष्णा मुखियाले धन्यवाद ज्ञापन गरेकी थिए।
