खरसाङ, (निसं)ः खरसाङ टुरिष्ट लजदेखि उकालो हिमाली बोर्डिङ स्कूल जाने सड़कमा रेलको लिक नजिक मोटर बाईक अनि स्कुटी सवारहरू पाईपमा चिप्लिएर लड़दैछन्। यस स्थानमा रेलको लिक पार गर्नसाथै बाटोमा बिछ्याइएको पानीको ठूलो पाईप रहेको छ। ती पानीको पाईपहरू सड़क मुनि नगाड़ेर सड़कमा अर्घेलो प्रकारले बिछ्याइएको हुनाले पाईपमा बाईक, स्कुटी चिप्लिने गरेको छ। यसै स्थानमा ती पाईपहरूबाट पानी निरन्तर चुहुने गरेकोले चुहेको पानीको कारण पाईप अझ चिप्लो हुने गरेको मोटर बाईक, स्कुटी चिप्लिएर सड़ने गरेको दुई चक्को सवारहरूले बताएका छन्।
डुमाराम बस्तीका एक मोटर बाईक सवारले आफ्नो मोटर बाईक यस स्थानको पाईपमा चिप्लिएर आईतवार लड़ेको बताएका छन्। तिनले भने, रातिको समयमा घर फर्कन्दै थिएँ। यस स्थानमा रहेको पानीको पाईप पार गर्न लाग्दा एक्कासी पाईपमा बाईक चिप्लियो। बाईक चिप्लिएपछि बाईक संगै म पनि लड़ेँ। यसरी लड़दा मलाई घुड़ामा र हातमा चोट लाग्यो। यस स्थानमा यसरी अर्घेलो प्रकारले पानीको ठूलो पाईप नबिछ्याउन पर्ने हो, पाईप जमिन मुनि गाड़नु पर्ने हो। यहाँ यस प्रकारले पानीको पाईप बिछ्याइएको छ भने यसै स्थानमा यी पाईपहरूबाट पानी लगतार चुहुने गरेको छ। पानी चुहेर सड़क, पाईप सबै भिजेको अवस्थामा हुन्छ। यस्तो अवथिमा मोटर बाईक, स्कुटी चिप्लिने गर्छ।
डुमाराम बस्तीकै अर्का एक व्यक्तिले पनि यस स्थानमा दुई-तीन पल्ट आफ्नो स्कुटी चिप्लिएको बताउदै भने, यहाँ रेलको लिक छ, रेलको लिक पार गर्नसाथै यसरी सड़कमा बिछ्याइएको पानीको ठूलो पाईपहरू पार गर्न पर्ने हुन्छ। यी पाईपहरू पार गर्दा अलिकति पनि गल्ती भयो भने मोटर बाईक- स्कूटी चिप्लिन्छ। म यहाँ दुई-तीन पल्ट लड़िसकेको छु, तथापि ठूलो चोट भने लागेन। तिनले यस स्थानमा मोटर बाईक र स्कुटी मात्र नभएर साना गाड़ी पनि यहाँ चिप्लिने गरेको पनि बताए। अर्को तर्फ खरसाङ टुरिष्ट लजदेखि उकालो हिमाली बोर्डिङ स्कूल तर्फ जाने यो सड़कमा बिछ्एको पानीको पाईपबाट नियमित पानी चुहेर राष्ट्रिय राजमार्गमा बग्ने गरेको छ। राष्ट्रिय राजमार्गमा लगतार चुहेको पानी बग्ने गरेकोले सड़क टिकाउ रहँदैन। यसैले यस स्थानमा राष्ट्रिय राजमार्ग जहिले पनि भत्किएको अवस्थामा रहने गरेको छ भन्ने धेरैले गुनासो छ।
