मजुवा, 9 जुलाई : पुल-बिजनबारी खण्ड विकासको पहलमा स्वच्छ भारत अभियानको कार्यक्रम मजुवा ग्रामबाट शुरू गरिएको छ।जसमा मजुवा ग्रामका दुइवटा संसद स्वच्छ गाउँ घोषित भएको छ। पहिलो चरणको कार्यक्रममा दार्जीलिङ पुल-बिजनबारी खण्ड विकास अधिकारी सत्यन गोईन, खण्डविकास सह-अधिकारी देनुका राई, मजुवा ग्राम पञ्चायत प्रधान रोगेन वाङ्दी लेप्चा, उप-प्रधान सरिता सुब्बा,ग्राम सचिव कुशल सुब्बा आदिको उपस्थितिमा स्वच्छ भारत अभियान अन्तर्गत मैला कुचेला आदिको छनौट गर्दै प्लास्टिकलाई रिसाइकलिङको निम्ति एकत्र गरियो। बिजनबारी खण्ड अन्तर्गत मैला कुचेला बोक्ने वाहनलाई मजुवा ग्रामबाट नै सञ्चालनमा ल्याइएको अधिकारी गोईनले बताए। पुल-बिजनबारी खण्डको पहिलो कार्यक्रममा नै मजुवा ग्राम संसद 1 अनि 3 लाई स्वच्छ गाउँको घोषित गरिएको छ। यसै सन्दर्भमा बोल्दै खण्ड विकास सह-अधिकारी देनुका राईले भने यो दुइवटा संसद मात्र होइन सम्पूर्ण मजुवा ग्राम नै स्वच्छ ग्रामको रूपमा चाँडै देख्न पाउँ, तर हाम्रो उदेश्य खण्ड विकास बिजनबारी नै स्वच्छ खण्ड भनेर पुल-बिजनबारीलाई घोषित गर्नु रहेको बताए।
स्वच्छ भारत अभियानको मैला कुचेलाको पक्षहरू सिध्याएपछि डा.राधाकृष्णन उच्चत्तर माध्यमिक विद्यालयमा सचेतना कार्यक्रमको आयोजना गरियो।
स्वच्छ भारत अभियानलाई लिएर मजुवा ग्राम पञ्चायत अनि विद्यालयको संयुक्त आयोजनामा सम्पन्न प्लास्टिक प्रतिबन्ध विषयमाथि सचेतना गराउदै दार्जीलिङ पूल-बिजनबारी खण्ड विकास अधिकारी सत्यन गोईन, खण्डविकास सहअधिकारी देनुका राई, मजुवा ग्राम पञ्चायत प्रधान रोगेन वाङ्दी लेप्चा, उप-प्रधान सरिता सुब्बा, सचिव कुशल सुब्बा, स्वच्छ भारत अभियान दार्जीलिङ जिल्ला संयोजक अनि विद्यालयका प्रधान अध्यापक पीके राईले स्वच्छ भारत अभियान सम्बन्धमा उपस्थित जनसाधारण लगायत विद्यार्थीहरूलाई प्लास्टिक प्रयोगबाट हुने नकारात्मक पक्षहरूको विस्तृत जानकारी गराउँदै जनसाधारणले नै जति सक्दो प्लास्टिकजन्य कुराहरूको प्रयोग नगर्ने अपिल गरे ।शिक्षिका भावना प्रधानले स्वागत मन्तब्य राखेको कार्यक्रमलाई शिक्षक सत्यम् राईले सञ्चालन गरेका थिए।
