अरुणाचल प्रदेशको तवाङ जिल्लाबाट बुद्ध मूर्ति तथा अन्य धार्मिक सामग्री चोरी गरेको आरोपमा पश्चिम बंगालका एक पर्यटकलाई प्रहरीले नियन्त्रणमा लिएको छ। सामाजिक सञ्जालमा भाइरल भएको सीसीटीभी फुटेजको आधारमा प्रहरीले उक्त व्यक्तिलाई पहिचान गरी नियन्त्रणमा लिएको हो।
प्रहरीका अनुसार ५४ वर्षका ती पर्यटकले तवाङ मठ परिसरबाट बुद्धको मूर्ति चोरेका थिए। साथै उनले बाट टिङ्शा (धार्मिक झ्याली) को एक जोडी र दुई वटा धातुका बटर ल्याम्प समेत लिएको बताइएको छ। यी सबै धार्मिक सामग्रीहरू स्थानीय रूपमा अत्यन्तै पवित्र मानिन्छन्।
तवाङका उप–पुलिस अधीक्षक कातो तासोका अनुसार चोरीको दृश्य सीसीटीभीमा कैद भएपछि भिडियो सामाजिक सञ्जालमा फैलिएको थियो। त्यसपछि प्रहरीले अनुसन्धान सुरु गरी ती व्यक्तिलाई बुधबार बिहान फेला पारेर नियन्त्रणमा लिएको हो। उनको साथबाट चोरी भएका सबै सामग्री बरामद गरिएको प्रहरीले जनाएको छ। बरामद सामग्रीको मूल्य करिब १५ हजारदेखि २० हजार रुपैयाँसम्म रहेको बताइएको छ।
तर मठ प्रशासनले कडा कानुनी कारबाही अघि नबढाउने निर्णय गरेको छ। चोरी भएका सामग्री फिर्ता भएपछि मठका भिक्षु तथा व्यवस्थापन समितिले ती पर्यटकलाई माफी दिएका छन्। उनले आफ्नो गल्ती स्वीकार गर्दै भविष्यमा यस्तो कार्य दोहोर्याउने छैन भन्ने लिखित प्रतिबद्धता पनि दिएका छन्।
प्रहरीका अनुसार उक्त व्यक्ति मार्च मा आफ्नी श्रीमतीसँग घुम्नका लागि तवाङ पुगेका थिए। घटनापछि प्रहरीले पर्यटकहरूलाई धार्मिक तथा सांस्कृतिक स्थलहरूको सम्मान गर्न र स्थानीय परम्पराप्रति संवेदनशील हुन आग्रह गरेको छ।
यस घटनाले पवित्र धार्मिक स्थलहरूमा पर्यटकहरूले अनुशासन र सम्मान कायम राख्नुपर्ने आवश्यकता पुनः स्मरण गराएको स्थानीय अधिकारीहरूले बताएका छन्।
