राजगञ्जस्थित पानीकौरी मोडमा मंगलबार राति लगातार चारवटा पसलमा चोरी भएपछि स्थानीय व्यापारीहरूमा त्रास फैलिएको छ। बाक्लो कुहिरो र कडा जाडोको आडमा सिलगडी–जलपाईगडी राष्ट्रिय राजमार्ग किनारमा उक्त घटना भएको हो।
स्थानीय स्रोतका अनुसार बुधबार बिहान पसल खोल्न पुगेका व्यापारीहरूले एकपछि अर्को गरी ताल्चा फुटाएको देखेपछि चोरी भएको थाह पाए। चोरी भएका पसलहरूमा रतन देवनाथको किराना पसल, झाडु देवनाथद्वारा सञ्चालित चिया–बिस्कुट पसल, राजीव रोयको सामान्य सामान तथा लटरी पसल र बसुमती रोयको चिया ठेला समावेश छन्। पसलधनीहरूका अनुसार प्रत्येक पसलबाट नगद रकम र केही सामान चोरी भएको छ। यद्यपि ती पसलहरूमा महँगो सामान नराखिए पनि दैनिक कमाइका रूपमा राखिएको नगद रकम चोरी हुँदा उनीहरू गम्भीर आर्थिक समस्यामा परेको बताएका छन्।
एकै रात, एउटै स्थानमा चार पसललाई निशाना बनाइएपछि क्षेत्रका व्यापारीहरूमा असुरक्षाको भावना बढेको छ। स्थानीय व्यापारीहरूले यस्ता घटना दोहोरिन नदिन रात्रीकालीन सुरक्षा कडा गर्न र प्रहरी गस्ती बढाउन माग गरेका छन्।
