असम राज्यको तिनसुकिया जिल्ला अन्तर्गत पर्ने मार्घेरिटा उप–जिल्लाको लेखापानी क्षेत्रमा भारतीय सेनाले ‘अपरेशन सिन्दूर’ को पहिलो वार्षिकोत्सव विविध कार्यक्रममार्फत मनाएको छ। राष्ट्रिय गौरव र समुदायसँगको सम्बन्धलाई अझ मजबुत बनाउने उद्देश्यले २५ अप्रिल २०२६ मा शैक्षिक संस्थाहरूमा विशेष जनचेतनामूलक कार्यक्रमहरू सञ्चालन गरिएको हो। उक्त अवसरमा जागुनस्थित Rosebuds High School तथा टिपोङस्थित Central Academy मा कार्यक्रम आयोजना गरिएको थियो। कार्यक्रममा भारतीय सेनाका जवानहरूले ‘अपरेशन सिन्दूर’ को महत्व, यसको उद्देश्य तथा राष्ट्रिय सुरक्षा र स्थायित्वमा यसको भूमिकाबारे विस्तृत जानकारी प्रदान गरेका थिए।
कार्यक्रमको सुरुवात जानकारीमूलक सत्रमार्फत गरिएको थियो, जसमा सैनिक अधिकारीहरूले साहस, त्याग र समर्पणजस्ता उच्च मूल्यहरूको महत्वबारे प्रकाश पारेका थिए। त्यसपछि आयोजित अन्तरक्रियात्मक सत्रमा विद्यार्थी तथा शिक्षकहरूसँग देशप्रेम, अनुशासन, सामाजिक जिम्मेवारी र राष्ट्रप्रतिको कर्तव्यबोधबारे छलफल गरिएको थियो। विद्यार्थीहरूलाई सकारात्मक सोच विकास गर्न र समाज तथा देशप्रति उत्तरदायी बन्न प्रेरित गरिएको थियो। उक्त कार्यक्रममा दुवै शैक्षिक संस्थाबाट गरी करिब १५० जना विद्यार्थीहरूको सहभागिता रहेको थियो, जसले कार्यक्रमलाई थप प्रभावकारी बनाएको थियो। यस पहलमार्फत भारतीय सेनाले युवापुस्तासँगको सम्बन्ध सुदृढ गर्दै नागरिक चेतना अभिवृद्धि गर्ने आफ्नो प्रतिबद्धतालाई पुनः पुष्टि गरेको छ। यस्ता कार्यक्रमहरूले स्थानीय समुदायसँगको सम्बन्ध अझ मजबुत बनाउनुका साथै नयाँ पुस्तालाई राष्ट्रसेवाप्रति प्रेरित गर्ने विश्वास गरिएको छ।भारतीय सेना राष्ट्रको सार्वभौमिकताको रक्षा गर्न सधैं प्रतिबद्ध रहँदै आएको छ र नागरिकहरूमा एकता, देशप्रेम तथा कर्तव्यनिष्ठाको भावना अभिवृद्धि गर्न निरन्तर अग्रसर रहने जनाएको छ।
