कालिम्पोङ जिल्लाको ४५ नम्बर समष्टि अन्तर्गत झोलुङ देवराली रङ्गशाला भवनमा जलढका पुलीस स्टेशनको कुशल आयोजना तथा सक्रिय पहलमा साइबर अपराधविरुद्ध व्यापक जनचेतना कार्यक्रम भव्य तथा व्यवस्थित रूपमा सम्पन्न भएको छ। प्रविधिको तीव्र विकाससँगै बढ्दो साइबर अपराधका घटनालाई मध्यनजर गर्दै आयोजना गरिएको यस कार्यक्रमले स्थानीय समुदाय, विद्यार्थी, अभिभावक तथा विभिन्न सामाजिक संघ–संस्थाका प्रतिनिधिहरूलाई डिजिटल सुरक्षासम्बन्धी महत्वपूर्ण जानकारी प्रदान गरेको थियो।
कार्यक्रममा प्रमुख अतिथिका रूपमा एसडीपीओ गोरुबथान विक्रमजित लामा, जलढका पुलीस स्टेशनका प्रभारी सामुएल इस्लाम, गोरुबथान सर्कल इन्स्पेक्टर डालिम अधिकारीको विशेष उपस्थिति रहेको थियो। साथै सुमन छेत्री, विभुषण थापा, विनम रनपहेली, सुभद्रा गुरुङ, गोपाल छेत्री लगायत स्थानीय समाजसेवी, बुद्धिजीवी तथा सर्वसाधारणको उल्लेखनीय सहभागिता रहेको थियो।
वक्ताहरूले साइबर क्राइमका नयाँ–नयाँ तरिका, अनलाइन ठगी, फेक कल, ओटीपी ठगी, सामाजिक सञ्जालको दुरुपयोग, मोबाइल गेममार्फत हुने आर्थिक तथा मानसिक शोषण, पोक्सो ऐन अन्तर्गत बालबालिकासम्बन्धी कानुनी प्रावधान, नारी तथा मानव तस्करी जस्ता ज्वलन्त विषयमा विस्तृत रूपमा प्रकाश पार्दै सचेतना जगाएका थिए। उनीहरूले विशेष गरी अभिभावकहरूलाई आफ्ना बालबालिकाको अनलाइन गतिविधिमा निगरानी राख्न, अपरिचित लिंक नखोल्न, गोप्य विवरण साझा नगर्न तथा कुनै पनि शंकास्पद गतिविधि देखिएमा तत्काल प्रहरीलाई जानकारी गराउन आग्रह गरेका थिए।
कार्यक्रमकै अवसरमा जलढका प्रहरीले विभिन्न स्थानबाट रिकभर गरेका ५ वटा हराएका मोबाइल फोन सम्बन्धित पीडितहरूलाई औपचारिक रूपमा हस्तान्तरण गरियो। ती मोबाइल लिनका लागि कलकत्ता र कुचबिहारबाट समेत पीडितहरू उपस्थित भएका थिए, जसले प्रहरीप्रतिको विश्वास र सहकार्यको उदाहरण प्रस्तुत गरेको छ।
यसका साथै दुई वर्षअघि फेक कलमार्फत तोदे निवासी सञ्जय कुमार तामाङको बैंक खाताबाट ठगी गरी लुटिएको १ लाख रुपैयाँ रकम प्रहरीले अनुसन्धान र सक्रिय पहलद्वारा फिर्ता गराउन सफल भएको थियो। सोही अवसरमा उहाँलाई चेक प्रदान गरी सम्मान गरिएको थियो। यस घटनाले जलढका पुलीस स्टेशनको दक्षता, प्रतिबद्धता तथा पीडितप्रतिको संवेदनशील व्यवहारलाई स्पष्ट रूपमा उजागर गरेको छ।
कार्यक्रम एसआई मधुरण तामाङको संयोजन तथा नेतृत्वमा सफलतापूर्वक सम्पन्न भएको हो। समग्रमा हेर्दा, जलढका पुलीस स्टेशनद्वारा आयोजित यस्ता सचेतनामूलक पहलहरूले स्थानीय स्तरमा अपराध न्यूनीकरण, डिजिटल सुरक्षाबारे जानकारी अभिवृद्धि तथा प्रहरी–जनता सम्बन्ध सुदृढ गर्न महत्वपूर्ण योगदान पुर्याएको विश्वास गरिएको छ।
