दार्जीलिङमा कलमको नीब, खरसाङ, कालेबुङ, सिलगढी, नक्सलबारीमा आइजीजेएफको चुनाव चिन्ह तोस रोटी। बिमल गुरूङ र भाजपा यति हदसम्म तल झर्छ भनेर मैले सोंचेको थिइनँ: अजय एडवर्डस इण्डियन गोर्खा जनशक्ति फ्रण्टले दार्जीलिङ विधानसभा आसनमा कलमको नीब अनि कालेबुङ, खरसाङ,सिलगढी, मतिगढा नक्सलबारी विधानसभा आसनमा तोस रोटी चुनाव चिन्ह प्राप्त गरेको केन्द्रीय संयोजक अजय एडवर्डसले बताएका छन्। तिनले अघि भने हाम्रो चुनाव चिन्ह जहिले पनि तोस रोटी हुने गर्थ्यो, यस पटक पनि हामीले तोस रोटी चुनाव चिन्ह रोजेका थियौं, कालेबुङ, खरसाङ, सिलगढी, नक्सलबारी विधानसभा आसनहरूमा हामीले तोस रोटी नै चुनाव चिन्ह पाएका छौं, तर दु:खको कुरा दार्जीलिङ विधानसभा आसनमा हामीले कलमको नीब चुनाव चिन्ह पाएको एडवर्डसले बताए। तिनले अघि भने, दार्जीलिङ विधानसभा आसनबाट निर्दलीय उम्मेद्वारको रूपमा खडा भएका जितेन घलेले तोस रोटी चुनाव चिन्ह पाएका छन्। जितेन घले नोमन राईको मित्र रहेको एडवर्डसले बताए। गोजमुमो प्रमुख बिमल गुरूङ इण्डियन गोर्खा जनशक्ति फ्रण्टसंग यति धेर डराएको रहेछ भन्ने हामीले स्पष्टसंग जान्ने मौका पायौ।बिमल गुरूङले आफ्नो कार्यकर्तालाई निर्दलीय उम्मेद्वार खडा गराएर तोस रोटी चुनाव चिन्ह रोज्न लगाएका छन्।
भारतीय जनता पार्टी जस्तो ठुलो पार्टी इण्डियन गोर्खा जनशक्ति फ्रण्टसंग डराएको छ अनि तोस रोटी चुनाव चिन्ह रोजेर हाम्रो मतदाताहरूको भोट हत्याउने गलत प्रयास गरेको छ। यस षडयन्त्रमा भाजपाको राष्ट्रिय प्रवक्ता तथा सांसद राजु विष्टको निर्देशमा भएको हो भन्ने खबर छ। बिमल गुरूङले आफुले आफैलाई गोर्खाको अभिभावक भन्छन्, तर उनको सोच यति नराम्रो रहेछ भनेर मैले कल्पना समेत नगरेको एडवर्डसले बताएका छन्। तिनले अघि भने तर जनता सुर्ताउनु पर्दैन, हामीले बाँदरकै चुनाव चिन्ह पायौ भने पनि हामीलाई जनताले अवश्यै जिताउने छ। चुनावमा आफ्नो नामांकन पत्र दर्ता गर्ने क्रममा तीनवटा चुनाव चिन्ह रोज्नु पर्छ,हामीले पनि तोस रोटी लगायत अन्य चुनाव चिन्ह रोजेका थियौ तर हाम्रो तोस रोटी चुनाव चिन्ह खोस्नलाई उनीहरूले पनि तोस रोटी चुनाव चिन्ह चयन गरेको थियो।भारतीय जनता पार्टीले पहाड तथा गोर्खाहरूको निम्ति केही गरेका छैन तर पनि उनीहरू दिल्लीको बैसाखी भएर उभिएको छ तर इण्डियन गोर्खा जनशक्ति फ्रण्ट मात्र क्षेत्रीयता बचाउँन चुनावी मैदानमा ओर्लिएको अजय एडवर्डसले बताए।
