आरनोवाको रजत जयन्ती अन्तर्गत छैटौं कार्यक्रम आयोजित

देशको राजधानी नयाँ दिल्लीमा स्थापित अनि सिलगढीमा सञ्चालित आरनोवा संस्थानले एक वर्षव्यापी रजत जयन्ती अन्तर्गत छैटौं कार्यक्रमको आयोजन आइतबार गरेको थियो। सिलगढीको चम्पासरी स्थित आरनोवा भवनको राष्ट्रिय सर्जक गोपालसिंह नेपाली बस्नेत मञ्चमा आयोजित कार्यक्रमको अध्यक्षता अवकाशप्राप्त पुलीस अधिकारी तथा आरनोवाका उपाध्यक्ष सन्तोषमणि राईले गरेका थिए। कार्यक्रममा गत २१ सेप्टेम्बरमा आयोजित रजत जयन्ती अन्तर्गत पाँचौं कार्यक्रम रीना सुब्बाकृत “परिवर्तित अनुहार”विषयको विमर्शमाथि चर्चा गरियो। त्यसपछिको कविता गोष्ठीमा मेनका तामङ, दिवाकर शर्मा ढुङ्गेल र सन्तोषमणि राईले आ-आफ्नो कविता प्रस्तुत गरे भने सञ्जीव श्रीमलले राष्ट्रिय सर्जक गोपालसिंह नेपाली बस्नेत लिखित कविता प्रस्तुत गरेका थिए। कार्यक्रममा आरनोवाले आयोजन गर्ने आगामी सातौं र आठौं कार्यक्रमहरूको रुपरेखा र घोषणा आरनोवाका संस्थापक रुबेन गुरूङले गर्दै दुवै कार्यक्रमलाई सफल पार्न सदस्यहरूलाई आह्वान गरेका थिए। कार्यक्रममा स्वागत वक्तव्य उपाध्यक्ष मोहन लुइँटेलद्वारा गरिएको थियो भने धन्यवाद ज्ञापन कोषाध्यक्ष सुनिता राईले र कार्यक्रमको सञ्चालन कार्यकारी सदस्य सङ्गीता राईले गरेकी थिइन्।