सिलगढी नगर निगम को पहलमा शनिबार सिलिगुडीको बाघजातिन पार्क मा फरक क्षमतायुक्त (दिव्याङ्ग) व्यक्तिहरूका लागि विशेष प्रमाणपत्र शिविर आयोजना गरिएको छ। उक्त शिविरको उद्देश्य फरक क्षमतायुक्त व्यक्तिहरूलाई आवश्यक दिव्याङ्गता प्रमाणपत्र सहज रूपमा उपलब्ध गराउनुका साथै उनीहरूलाई विभिन्न सरकारी सुविधा तथा योजनासम्म पहुँच पुर्याउनु रहेको बताइएको छ।
शिविरका क्रममा स्वास्थ्यकर्मी तथा सम्बन्धित विभागका अधिकारीहरूले उपस्थित आवेदकहरूको स्वास्थ्य परीक्षण तथा कागजातको जाँच गरी दिव्याङ्गता प्रमाणपत्रका लागि आवश्यक प्रक्रिया पूरा गराएका थिए। यस्ता प्रमाणपत्र प्राप्त भएपछि फरक क्षमतायुक्त व्यक्तिहरूले सरकारद्वारा प्रदान गरिने विभिन्न सामाजिक सुरक्षा योजना, आर्थिक सहायता तथा अन्य सहुलियतहरूको लाभ लिन सक्नेछन्।
कार्यक्रममा नगर निगमका अधिकारीहरू, स्वास्थ्यकर्मीहरू तथा स्थानीय प्रतिनिधिहरूको उपस्थिति रहेको थियो। शिविरमा सहभागी हुन आएका धेरै फरक क्षमतायुक्त व्यक्तिहरू तथा उनीहरूका अभिभावकहरूले आवश्यक कागजात बुझाएर प्रमाणपत्र प्राप्त गर्ने प्रक्रिया पूरा गरेका थिए।
नगर निगमका अधिकारीहरूका अनुसार यस्ता शिविरहरू समय–समयमा आयोजना गर्दै दिव्याङ्गता प्रमाणपत्र प्राप्त गर्ने प्रक्रियालाई अझ सहज र पहुँचयोग्य बनाउने प्रयास गरिएको छ। धेरै व्यक्तिहरूलाई सरकारी कार्यालयमा पुगेर प्रक्रिया पूरा गर्न कठिन हुने भएकाले यस प्रकारका शिविरहरू स्थानीय स्तरमै सञ्चालन गर्दा लाभग्राहीहरूलाई ठूलो सहयोग पुग्ने विश्वास व्यक्त गरिएको छ।
सिलिगुडी नगर निगमले आगामी दिनहरूमा पनि यस्ता सामाजिक तथा जनकल्याणमुखी कार्यक्रमहरू सञ्चालन गर्दै फरक क्षमतायुक्त व्यक्तिहरूको अधिकार, सुविधा र समावेशी सहभागिता सुनिश्चित गर्न पहललाई निरन्तरता दिने जनाएको छ।
