सिलीगुडीमा ठूलो प्रशासनिक परिवर्तनको सम्भावना देखिएको छ। मतिगडा, शिवमन्दिर र बागडोगरालाई समेटेर नयाँ नगर निगम गठन गर्ने तयारी भइरहेको छ। साथै, सुशासन सुदृढ गर्दै विकासलाई तीव्रता दिन सिलीगुडीलाई छुट्टै जिल्ला घोषणा गर्ने योजना पनि अघि बढाइएको बताइएको छ। प्रस्तावअनुसार मतिगडा, शिवमन्दिर र बागडोगरा क्षेत्रलाई एउटै शहरी निकायअन्तर्गत ल्याइनेछ। यस कदमले सरसफाइ, नागरिक पूर्वाधार, शहरी योजना तथा सरकारी परियोजनाको कार्यान्वयनमा सुधार आउने अपेक्षा गरिएको छ। साथै, स्थानीयस्तरमा नयाँ रोजगारीका अवसर पनि सिर्जना हुने विश्वास गरिएको छ।
यस विषयमा बोल्दै विधायक आनन्दमय बरमन ले यो प्रस्ताव क्षेत्रको समग्र विकासका लागि ऐतिहासिक कदम हुने बताए। उनले भने, “यो निर्णय क्षेत्रको समग्र विकासतर्फको ऐतिहासिक कदम हो। हाम्रो प्राथमिकता जनतासम्म अझ राम्रो सेवा र सुविधा पुर्याउनु हो।” प्रस्तावित सिलीगुडी जिल्लाले प्रशासनिक कार्यक्षमता बढाउने, स्थानीय समस्याको छिटो समाधान गर्ने तथा शिक्षा, स्वास्थ्य र शान्ति सुरक्षाजस्ता सार्वजनिक सेवाहरूलाई अझ सुदृढ बनाउने अपेक्षा गरिएको छ। यस घोषणापछि स्थानीय बासिन्दामाझ व्यापक चासो देखिएको छ। प्रस्तावित परिवर्तनले सिलीगुडी क्षेत्रको पूर्वाधार, सुशासन र आर्थिक अवसरलाई अझ मजबुत बनाउने विश्वास धेरैले व्यक्त गरेका छन्।
