मिरिक बस्तीमा ‘लेट शान्ता लामा मेमोरियल च्यालेन्ज शिल्ड मिनी पोस्ट फुटबल टुर्नामेन्ट’को फाइनल आइतबार हुने भएको छ। मिरिक, नवजागरण समाज पहिला गाउँ मिरिक बस्तीको आयोजनामा गत केही दिनदेखि सञ्चालन हुँदै आएको ‘लेट शान्ता लामा मेमोरियल च्यालेन्ज शिल्ड फुटबल टुर्नामेन्ट (मिनी पोस्ट)’ अब अन्तिम चरणमा पुगेको छ। तर, बीचमा समाजभित्रै केही व्यक्तिहरूको देहान्त हुनुका साथै प्राकृतिक प्रकोपका कारण आवतजावतमा आएको असुविधा र अन्य समस्याका कारण अन्तिम खेल समयमै सम्पन्न गर्न नसकिएको आयोजक कमिटिले जनाएको छ। नवजागरण समाज पहिला गाउँ मिरिक बस्तीले हिजो बसेको कार्यकारिणी समिति बैठकले निर्णय गर्दै टुर्नामेन्टको फाइनल खेल आगामी आइतबार, मिति १६ नोभेम्बर २०२५ का दिन खेलाइने जनाएको छ। आयोजक समाजले फाइनल खेल ढिलो भएकोमा सम्पूर्ण खेल प्रेमी, सहभागी टोलीहरू र स्थानीय बासिन्दासँग क्षमायाचना गर्दै आगामी आइतबार हुने उक्त फाइनल खेलमा सबै फुटबल प्रेमी दर्शकहरूलाई उपस्थित भई खेलको आनन्द लिन हार्दिक अनुरोध गरेको छ। समाजका प्रतिनिधिहरूका अनुसार, उक्त प्रतियोगिताले मिरिक क्षेत्रका युवाहरूमा खेलप्रति रुचि, एकता र सामाजिक भावनाको विकासमा सहयोग पुर्याउने विश्वास लिइएको छ।
