सिलगढी नगर निगमको तत्वावधान ४३ नम्बर वार्ड कमिटीको आयोजनामा “आलिङ्गन वार्ड उत्सव – २०२५ भव्यरुपमा आयोजन भइरहेको छ। गत २१ दिसम्बरदेखि विभिन्न खेलकुद प्रतियोगिताबाट आरम्भ भएको वार्ड उत्सव २६दिसम्बरदेखि विभिन्न भाषाको सांस्कृतिक कार्यक्रमबाट समापन भयो। सांस्कृतिक कार्यक्रमको पहिलो दिन २६ दिसम्बर को दिन बंगला सांस्कृतिक कार्यक्रम, २७ दिसम्बरको दिन नेपाली सांस्कृतिक कार्यक्रम अनि २८ दिसम्बरको दिन हिन्दी सांस्कृतिक कार्यक्रम अत्यन्तै भव्यरुपमा सम्पन्न भयो। तीनै दिनको कार्यक्रमका अध्यक्ष ४३नम्बर वार्डका काउन्सिलर सुकदेव महतो थिए भने मुख्य अतिथि सुश्री शोभा सुब्बा ( ४२ नम्बर वार्ड काउन्सिलर) थिइन्। विशिष्ट अतिथिहरुमा गोविन्द छेत्री ( Public Prosecutor), सन्तोष खड्गा ( अध्यक्ष: भानु संघ अनि मंगल माइती संस्था) , श्रीमती बनिता गिरी राई ( Dir. Holycrown English School) थिइन् भने विशेष रुपमा राजेश प्रसाद ( MMIC, SMC) को पनि उपस्थिति रहेको थियो। यस दिनको कार्यक्रममा विभिन्न रंगारंग कार्यक्रम संगै स-साना नानीहरुको नृत्य प्रतियोगिता पनि सम्पन्न भएको थियो। साथै यस वार्डमा वरिष्ठ नागरिकहरुलाई वार्ड काउन्सिलर सुकदेव महतोको बाहुलीबाट श्रद्धा अनि पुष्पगुच्छा संगै मायाको चिनो (मेमेन्टो) प्रदान गरि सम्मान गरिएको थियो। सम्मानित हुनेहरूमा डम्बर प्रधान, राधिका सिन्हा, कर्मा शेर्पा, कमला डुक्पा श्रीनिवास, श्रीमान दुर्गा साम्बा, ऐती सुब्बा, रामप्रसाद छेत्री, राधिका मोहरा, लालबहादुर गुरुङ बलकुमारी विश्वकर्मा र शुभला राई उपस्थित थिए।
यस दिनको सांस्कृतिक कार्यक्रमका मुख्य आकर्षण नर्थ बंगालका एक समयका ख्यातिप्राप्त गायक फौदा सिंह गुरूङ अनि हास्य कलाकार चन्दन लामा रहेका थिए। उक्त कार्यक्रमका सञ्चालक कृष्ण गुरुङ (नाट्य-सिने कलाकार) र सबिन छेत्रीले खुबै सुन्दर ढंगमा सञ्चालन गरेका थिए। नेपाली सांस्कृतिक कार्यक्रममा नृत्य प्रतियोगिताका निर्णायक मण्डलीमा प्रेम विश्वकर्मा (शास्त्रीय नृत्य प्रशिक्षक,मिरिक) मनिष सुब्बा (दार्जीलिङ) रहेको आयोजन समितिका संयोजक प्रकाश चन्द्रनले जानकारी दिएका छन्।।
