मानेबोङ देन्ताम समष्टिको तामाबुङ विद्यालयमा बिहीबार विधायक सुदेश कुमार सुब्बाले औपचारिक निरीक्षण भ्रमण गरेका थिए। यस अवसरमा विभागीय अधिकारीहरू, अभियन्ता किरण शर्मा, विद्यालय व्यवस्थापन समिति (SMC) सदस्यहरू, शिक्षक शिक्षिकाहरू तथा स्थानीय गाउँलेहरूको उपस्थिति रहेको थियो।
निरीक्षणको क्रममा विद्यालय परिसरमा रहेको एउटा पुरानो जीर्ण भवनको अवस्था अवलोकन गरी विधायक सुब्बाले उक्त भवनलाई भत्काएर नयाँ भवन निर्माणका लागि आवश्यक पर्ने विस्तृत परियोजना प्रतिवेदन (DPR) तयार पार्न अभियन्ता किरण शर्मालाई निर्देशन दिए। यसका साथै, हाल सञ्चालनमा रहेका कक्षा कोठाहरूको मर्मतसम्भार र आवश्यक पूर्वाधार सुविधाहरू थप गर्नुपर्नेमा पनि उनले विशेष जोड दिए। यसै क्रममा सबै आवश्यक कुराहरूको कार्ययोजना तयार गर्न सम्बन्धित पक्षहरूलाई निर्देशन दिइएको छ।
