खरसाङ, (निसं): खरसाङबाट बेलुकीको समयमा सिलगढ़ी झर्ने गाड़ीको अभाव भइरहेको जनगुनासो छ। दिउँसोको 2 बजेसम्म गाड़ी राम्रैसित पाइने भए तापनि 2 बजेदेखि रातिसम्म सिलगढ़ी झर्ने गाड़ी पाउनलाई धेरै समस्या झेल्न पर्ने खरसाङ्का कतिपय यात्रीहरूले गुनासो गरेका छन्।
डुमारामका एक व्यक्तिले पाँच दिन अघि सिलगढ़ी जानलाई घरबाट बेलुका निस्किएको तर बजारमा गाड़ी नपाएर एक घण्डा भन्दा अघिक समय गाड़ी पाउनलाई प्रतिक्षा गर्नु परेको बताए। तिनले भने, खरसाङ सेण्डिकेटमा गाड़ी थिएन, दार्जीलिङबाट आउने गाड़ी सबै यात्री भरी लिएर आइरहेका थिए। यसरी गाड़ी पर्खन्दा दिक्क भएको थिएँ। अन्तमा दार्जीलिङबाट आएको एउटा गाड़ीमा हामी सबै कोचरिएर सिलगढ़ी गयौँ। खरसाङ सेण्डिकेटमा पर्याप्त गाड़ी छन्, सेण्डिकेटले बेलुकाको समयमा पनि पर्याप्त गाड़ी सेवामा राख्न पर्ने हो।
यसरी नै खरसाङ बजारका एक व्यक्तिले पनि वर्तमान समयमा बेलुका सिलगढ़ी झर्नलाई समस्या हुने गरेको बताए। तिनले पनि अघिको जस्तो गाड़ी बेलुकाको समयमा नपाइने गरेको बताउदै खरसाङ सेण्डिकेटमा बेलुकाको समय गाड़ी नरहने गरेको पनि गुनासो गरे।
यस बारेमा खरसाङ सेण्डिकेटका एक चालकसित प्रश्न गर्दा तिनले भने, वर्तमानमा के कारणले हो, सिलगढ़ी झर्ने यात्रीको संख्या अधिक छ। पहिलाबाटै विभिन्न होमस्टेहरूमा बसेका यात्रीहरू ओह्रालो झरिरहेका छन्। अर्को तर्फ हामीलाई बेलुका यात्री लिएर सिलगढ़ी आएपछि फर्कन्दा समस्या हुने गर्छ। हामी खरसाङबाट यात्री लिएर त आउँछौँ तर फर्कन्दा यात्री नभएपछि खाली गाड़ी फर्कन पर्ने हुन्छ।
यसरी खाली फर्कन्दा हामीले नोक्सान खप्नु पर्ने हुन्छ। यसो हुँदा हामी बेलुका सिलगढ़ी झर्न मन गर्दैनौँ। तिनले मंगलवार चार बजे आफू खरसाङबाट सिलगढ़ी झरेको राति फर्कन्दा यात्री नभएपछि खाली गाड़ी खरसाङ फर्कनु परेको पनि बताए।
