छिमेकी राष्ट्र सारेगामापा लिटल चेम्प्स सिजन–२ का विजेता रिन्छेन दोर्जे तामाङको सम्मानमा गीतडाब्लिङमा आयोजित विजय रैली उत्साहपूर्ण वातावरणका बीच भव्य रूपमा आयोजन गरिएको थियो। स्थानीय बासिन्दा, विद्यालयका विद्यार्थी तथा अभिभावकहरूको उल्लेखनीय सहभागिताले पुरै क्षेत्र उत्सवमय बनेको थियो।
कार्यक्रममा गीतडाब्लिङ हाई स्कूल तथा सेन्ट जोसेफ स्कूलका विद्यार्थीहरूले उपस्थिति जनाएका थिए। यसैबीच, सेन्ट स्टेफन अकादमीका विद्यार्थीहरूले प्रस्तुत गरेको सुन्दर नृत्यले सबैको मन जित्यो र कार्यक्रमलाई झनै आकर्षक बनायो। कार्यक्रमको मुख्य आकर्षण भनेकै रिञ्छेन दोर्जे तामाङद्वारा प्रस्तुत गीतहर थिए, जसले दर्शकदीर्घालाई उत्साह, ताली र उल्लासले भरिदियो। र्यालीमा साथ दिइरहेको ब्यान्ड टोलीले निरन्तर बजाएको स्वागत धुनले वातावरणलाई अझै जीवन्त बनायो।
कार्यक्रममा रेभरेन्ड फादर फिलिक्स डिसुजाले रिञ्छेनलाई भोट र समर्थन दिई विजयी बनाइदिनु भएका सबै गीतडाब्लिङवासीप्रति हार्दिक धन्यवाद व्यक्त गर्दै यो उपलब्धि समुदायकै गौरव भएको बताए। त्यस्तै, सन्तोष छेत्री र सुरेश क्षेत्रीले पनि सम्बोधन गर्दै रिञ्छेनको कडा मेहनत तथा प्रतिभाको प्रशंसा गर्दै उज्ज्वल भविष्यका लागि शुभकामना व्यक्त गरे। कार्यक्रमको अन्त्यमा शिक्षक भलेरियन लेप्चाले सबै विद्यालय, अभिभावक, स्थानीय समाज, सुरक्षा व्यवस्थापन तथा सहभागीहरूलाई धन्यवाद व्यक्त गर्दै र्यालीले गीतडाब्लिङको सांस्कृतिक पहिचानलाई झनै चम्काएको बताए। यो विजयी रैली गीतडाब्लिङका लागि कला, संस्कृति र सामुदायिक एकताको सुन्दर उदाहरण बनेर स्मरणीय रहेको जानकारी पाइएको छ।
