खरसाङ, (निसं)ः खरसाङको 0608 आईसीडीएस सेन्टरमा खरसाङ शहर चिम्नी देवराली समष्टिका सभासद् श्याम शेर्पाले निरीक्षण भ्रमण गरे। यस भ्रमणको अवधिमा तिनले मा बाल-बालिकाहरूलाई भिटामिन ए पनि खुवाए। वार्ड न0 को यस आईसीडीएस सेन्टरमा आइतवार 2 वर्षदेखि 5 वर्षसम्मका नानीहरूलाई भिटामिन ए खुवाउने कार्यक्रम सम्पन्न गरिएको हो। यस कार्यक्रममा आईसीडीएस कर्मी सीता प्रधान, सहायिका निर्मला छेत्री, आशाकर्मी साथै स्वस्थ्य कर्मी सरोजा लामाले शिविरमा कार्य गरेका थिए। बिहान 11 बजेदेखि आरम्भ गरिएको उक्त शिविरमा वार्ड नम्बर 7 अनि वरिपरिका अभिभावकहरूले आफ्नो नानीहरूलाई लिएर आएका थिए।
यस कार्यक्रममा निरीक्षण गर्दै सभासद्ले बाल-बालिकाहरूलाई भिटामिन ए खुवाएका हुन्। सभासद्ले बाल-बालिकाहरूमा भिटामिन ए कमी भए विभिन्न समस्याहरू सृजना हुने बताउदै यस्ता समस्याहरू नानीहरूमा आउन नदिनको निम्ति सबैले आफ्नो 5 वर्षसम्मका नानीहरूलाई यसरी आयोजना गरिने शिविरमा लगेर भिटामिन ए खुवाउन पर्ने बताए।
शिविरको बारेमा आईसीडीएस कर्मी सीता प्रधान अनि स्वस्थ्य कर्मी सरोजा लामाले जानकारी गराए अनुसार कति नानीहरूले घरमा सागसब्जी खान मन्दैनन्, प्याकेट फुड खानु मन पराउछन्, जसको कारण नानीहरूमा भिटामिन एको कमी भएर जान सक्छ। भिटामिन एको कमी भए नानीहरूको स्वास्थमा असर पर्छ यसैले सरकारी कार्यक्रम अनुसार समय समयमा जुगाको औषधि, भिटामिन वितरण गरिन्छ वा यस्ता शिविरहरूमा नानीहरूलाई बोलाएर खुवाउने गरिन्छ। भिटामिन ए खुवाउनाले नानीहरूलाई फाईदा हुन्छ साथै आँखालाई राम्रो हुन्छ, अन्धपनदेखि नानीहरूलाई बचाउन सकिन्छ। तिनीहरूले कार्यक्रममा सभासद् श्याम शेर्पा निरीक्षणमा आएकोमा उनलाई हामी धन्यवाद दिन्छैाँं, यसरी शिविरमा निरीक्षण भ्रमण गरिदिएको खण्डमा हामीलाई पनि काम गर्ने उत्साह र उर्जा प्राप्त हुनेछ भने।
