लगातार रुपमा परिरहेको पानी झरीले गर्दा तीनधारे महानदी क्षेत्रमा आइतबार जनजीवन प्रभावित बनाएको थियो। राष्ट्रिय राजमार्ग 110 अन्तर्गत तीनधारेको 17 माइल क्षेत्रमा नै रोडभरि पानी जमिएर यातायातमा धेरै असुविधा र रोड बन्द भएको थियो भने केही समयपछि जेसीबी लगाएर सफा गरेर रोड खुलाइएको थियो।
त्यसरी नै राष्ट्रिय राजमार्ग 110 को दुई नम्बर बस्ती क्षेत्रमा एउटा ठूलो रुख छलेर बिहान रोड बन्द भएको थियो भने क्षेत्रीय सभासद नवराज छेत्री र अन्यको पहलमा 2 घण्टापछि रोड खोलिएको थियो। तीनधारेको बजारदेखि चुनभट्टी निस्कने ओल्ड मिलिटेरी रोडमा मिठाईडाँडामुनितिर पैह्रो गएपछि रोड बन्द भएको थियो जसमा क्षेत्रीय सभासद नवराज छेत्री र घैयाबारी ग्राम पञ्चायत दुईको उप प्रधान रञ्जित थापा र टोली पुगेर पोलिथिन लगाउने कार्य गरिएको थियो। उक्त रोड पैह्रोको कारणले बन्द नै रहेको बताइएको छ। त्यसरी नै दुई नम्बर बस्ती क्षेत्रमा धेरै स्थानमा पैह्रो गएको जानकारी प्राप्त भएको छ। यसको साथै राष्ट्रिय राजमार्ग 110 अन्तर्गत सिलिम हिल क्षेत्रमा बनिरहेको रोडमा पनि पैह्रो गएको जानकारी प्राप्त भएको छ। क्रमशः तीनधारेदेखि सिविटार जाने रोडमा पनि पैह्रो गएर रोड वाधित बनेको छ। यसै क्रममा राष्ट्रिय राजमार्ग 110 अन्तर्गत रंगटङ्ग क्षेत्रमा पनि पैह्रो गएर रुख ढलेर रोड बिहान वाधित बने पनि केही समयपछि खोलिएको थियो।
