खरसाङ, (निसं): शेर्पा सोसियल वेलफेर ग्रुप खरसाङद्वारा गत 4 अक्टोबर रातिको भारी वर्षाको कारण शेर्पा बस्ती बीच गाउँमा शेर्पा गुम्बा नजिक पैह्रोको कारण बन्द रहेको हिँड़ने बाटो साफ-सफाई गरिएको छ। स्थानीय डिकी शेर्पाको घर मुनी पहिरोको कारण उक्त बाटो बन्द रहेकोले मानिसहरूलाई हिँड़न धेरै असुविधा भइरहेको थियो।
यस अवधि शेर्पा सोसियल वेलफेर ग्रुप खरसाङद्वारा जनाइए अनुसार, डिकी शेर्पा शेर्पा सोसियल वेलफेर ग्रुपका एकजना सदस्य हुन्। तिनको पतिको स्वर्गवास भइसकेको छ भने तिनी अनि तिनकी छोरी मात्र घर-परिवारमा रहेकीले यस आपद-विपतको समयमा वेलफेयर ग्रुपद्वारा तिनलाई सहयोग गर्ने निर्णय लिँदै बाटो सफाईको कार्य गरिएको हो। वेलफेयर ग्रुपका सभापति लाक्पा शेर्पा अनि वरिष्ठ प्रतिनिधि सानु शेर्पाको अगुवाईमा पहिरो पीड़ित डिकी शेर्पाको घर मुनिलो भागमा बाटोमा थुप्रिएको ढुङ्गा-माटोलाई हटाउने अनि सफा गर्ने कार्य संस्थाका लगभग 60 जना सदस्यहरूद्वारा गरिएको थियो ।
उक्त वेलफेयर ग्रुप वा संस्थाले प्रति महिना दुई वा तीन पल्ट सेवा कार्य निरन्तर गर्दै आइरहेको छ। त्यति मात्र होइन, मरौ-परौमा पनि संस्थाले आ-आफ्नो सदस्यबाट मासिक शुल्क संग्रह गरेर सदस्यहरूलाई आर्थिक सहयोग गर्दै आईरहेको जनाइएको छ। शेर्पा बस्तीमा यो संस्था जनकल्याणको निम्ति सदैव अघि बढ़िरहेको जानकारी वार्ड नम्बर 7 का भुतपूर्व नगरपार्षद सञ्जय मुखियाले दिएका छन्।
