दार्जिलिङ जिल्लाअन्तर्गत फाँसिदेवामा शुक्रबार राति भएको सडक दुर्घटनामा एक जना साइकल चालकको मृत्यु भएको छ भने मोटरसाइकलमा सवार दुई जना गम्भीर रूपमा घाइते भएका छन्। प्राप्त जानकारीअनुसार लेउसिपाकुरी हातिराम जोत क्षेत्रमा उक्त दुर्घटना भएको हो। स्थानीय स्रोतका अनुसार मृतक साइकल चालक बजारबाट आफ्नो घरतर्फ फर्किँदै थिए। सोही क्रममा पछाडिबाट तीव्र गतिमा आइरहेको मोटरसाइकलले उनलाई ठक्कर दिएको बताइएको छ। ठक्करपछि साइकल चालक सडकमा लडेका थिए भने मोटरसाइकल अनियन्त्रित भई दुर्घटनामा परेको थियो। दुर्घटनापछि आसपासका स्थानीय बासिन्दाहरू घटनास्थलमा पुगेर घाइतेहरूलाई तत्काल उद्धार गरेका थिए। उनीहरूलाई उपचारका लागि फूलबारीस्थित एक निजी अस्पतालमा लगिएको थियो।
तर चिकित्सकहरूले साइकल चालकलाई अस्पताल पुग्नेबित्तिकै मृत घोषणा गरेका थिए। यसैबीच, मोटरसाइकलमा सवार दुई जना घाइतेहरूको अवस्था गम्भीर रहेको र उनीहरूको उपचार भइरहेको अस्पताल स्रोतले जनाएको छ। दुर्घटनापछि मृतकको पहिचान प्रक्रिया अघि बढाइएको छ भने परिवारजनलाई खबर गरिएको पुलीसले जनाएको छ। घटनापछि स्थानीय क्षेत्रमा शोकको वातावरण छाएको छ। पुलीसले दुर्घटनाको कारणबारे अनुसन्धान सुरु गरेको र मोटरसाइकल चालकको लापरवाही वा अत्यधिक गति दुर्घटनाको कारण हुन सक्ने प्रारम्भिक अनुमान गरिएको छ।
