मिरिकको कृष्णनगर अदालत नजिक एउटा बाँदर गम्भीर घाइते अवस्थामा फेला परेपछि स्थानीय बासिन्दाको जानकारीमा मिरिक वन विभागका अधिकारी तथा कर्मचारीहरू घटनास्थलमा पुगेर तत्काल उद्धार गरेका छन्। त्यसपछि बाँदरलाई मिरिक भेटेरिनरी अस्पतालमा प्रारम्भिक उपचार गरियो, जहाँ उसको अवस्था स्थिर बनाइएको जानकारी प्राप्त भएको छ। उपचारपछि बाँदरलाई थप स्याहार र पारम्परिक औषधीय उपचारका लागि मिरिक वन विभागको कार्यालयमा राखिएको छ। मिरिक वन विभागका अधिकारीका अनुसार बाँदरको अवस्थाबारे विभागीय अफिसरलाई सूचित गरिएको छ र वाइल्ड लाइफ टोलीद्वारा त्यसको थप हेरचाह र संरक्षणका लागि लगिने तयारी भइरहेको छ। स्थानीय जनताको सक्रियताले समयमै उद्धार सम्भव भएको वन विभागले जनाएको छ।
