गोर्खा राष्ट्रिय मुक्ति मोर्चाको केन्द्रीय समितिको पुनर्गठन

गोर्खा राष्ट्रिय मुक्ति मोर्चाको केन्द्रीय समिति पुन:गठन गरिएको छ। पार्टीको केन्द्रीय कार्यालयमा बसेको सभामा केन्द्रीय समिति पुन:गठन गरिएको पार्टीका मिडिया सेल प्रभारी दिनेस साम्पाङले जानकारी दिएका छन्। सभाको अध्यक्षता दार्जीलिङ विधानसभा क्षेत्रका विधायक निरज जिम्बा, गोरामुमो वरिष्ठ नेतृत्वगण, युवा वर्ग दार्जीलिङ ब्राञ्च कमिटी, गोरामुमो कालेबुङका नेतृत्ववर्ग, खर्साङ ब्राञ्च कमिटी, मिरिक ब्राञ्च कमिटी साथै भ्रातृ संगठनका प्रतिनिधिवर्ग उपस्थित रहेका थिए। गोरामुमो केन्द्रीय समिति अध्यक्ष पदमा सर्वसम्मतिले मन घिसिङ उपाध्यक्षमा एनबी छेत्री अनि मिरिकको निम्ति केन्द्रीय समिति सेक्रेटरी जनरलमा ऋषि थापा अनि वाई लामालाई केन्द्रीय प्रवक्ता चयन गरिएको छ। सभामा पार्टी अध्यक्ष मन घिसिङद्वारा ३४ जनालाई सर्वसम्मतिले केन्द्रीय समितिमा चयन गरिएको छ भने, केन्द्रीय समितिमा नयाँ युवावर्गलाई पनि सामेल गरिएको छ। नयाँ केन्द्रीय समितिमा चयन भएका सदस्यगणलाई पार्टी अध्यक्ष मन घिसिङद्वारा नियुक्ति पत्र हस्तान्तरण गर्दै श्रद्धा लगाएर स्वागत जनाएका थिए।
सभापछि पत्रकारहरुलाई सम्बोधन गर्दै एनबी छेत्रीले भने, आजको सभाले वर्तमान गोर्खाहरुको स्थायी राजनैतिक समाधानको निम्ति सरकारी वार्ताकार नियुक्त गरेकोमा स्वागत जनाएका छन्। २०२६ को फेब्रुअरी महिनामा इन्टरलोकुटर दार्जीलिङ आउने छन्। हामी उनलाई जति सक्दो चाँडै गोर्खाहरुको समाधानको निम्ति पहल गर्नेछौं। पार्टीको डिलिस्टिङ्ग विषयमा जवाफ दिंदै एनबी छेत्रीले भने, गोरामुमोले गृहमन्त्रालय अनि चुनाव आयोगमा पत्राचार गरेको छ। अब चुनाव आयोगले चाँडै सुनवाइ गर्ने भएको छ। यदि नभएको खण्डमा सर्वोच्च अदालत पनि छ भनी छेत्रीले जनाए।