खरसाङ , (निसं): पहाड़का 313 जना शिक्षक-शिक्षिकाहरुको साथमा रहेर सघाउन तयार रहेको बौद्ध धर्म गुरु पेम्बा रिम्पोर्छेले बताएका छन्। उनले 313 जना शिक्षक-शिक्षिकाहरुलाई नअत्तालिने र केही नहुने साथै कसैको नोकरी नजाने कारण पहाड़को अलग्गै प्रावधान छ भनी बताएका छन्। उनले आफु पूर्ण रुपमा 313 जना शिक्षक-शिक्षिकाहरुको साथमा रहेर सघाउने बताए।
उनले भने, यो गोर्खा जातिमाथि आइपरेको संकट हो र म पूर्ण रुपमा शिक्षकहरुको साथमा रहेर सघाउन तयार छु। पहाड़मा शिक्षा व्यवस्था र शिक्षक-शिक्षिकाहरुमाथि ठूलो ग्रहण लागेको र 313 जना शिक्षक-शिक्षिकाहरुको नाममा पहाड़मा 36 हजार शिक्षक-शिक्षिकाहरुमाथि ग्रहण लागेको बौद्ध धर्म गुरु पेम्बा रिम्पोर्छेले बताएका छन्। उनले गोर्खाहरुमाथिअन्याय र अत्यचार हुँदा र समस्या आइपरेको बेला पनि गोर्खाहरु नै रमाईरहेको बताउँदै कोही सानो जीटीएको कुर्सीको लोभमा पनि छन् भनी बताएका छन्।
उनले भने, यो ससम्या शिक्षक-शिक्षिकाहरु र विद्यार्थीहरुले पनि भोगिरहेको छ। अहिले 313 जनाबाहेक पनि 36 हजार शिक्षक-शिक्षिकाहरुमाथि समस्या आइपरेको छ र 36 हजार शिक्षक-शिक्षिकाहरु हट्नु भनेको पहाड़को शिक्षा व्यवस्था डामाडोल हुनु हो। के गोर्खाहरुलाई शिक्षा लिने अधिकार छैन यो प्रश्न राज्य र केन्द्र सरकार दुवैलाई हो। उनले अघि भने, पहाड़मा अहिले गोर्खाले गोर्खालाई पढ़ाउनेहरुलाई नै आह्रिस गरिरहेको छ। तर म 313 जना शिक्षक-शिक्षिकाहरुलाई सघाउन तयार रहेको छु।
