सञ्चार तथा सूचना प्रविधिमन्त्री डा. विक्रम तिमिल्सिनाले सार्वजनिक संस्थानहरुको सुधार र पुनर्संरचना गर्न अपरिहार्य रहेको बताउनुभएको छ। गोरखापत्र प्रकाशनको १२६औँ वर्ष प्रवेशका अवसरमा आज आयोजित कार्यक्रममा उहाँले समयानुकूल ढंगले सार्वजनिक संस्थानलाई अघि बढाउन सरकारले आन्तरिक गृहकार्य गरिरहेको उल्लेख गर्नुहुँदै संस्थानको हितलाई केन्द्रमा राखेर कर्मचारीले पनि थप जिम्मेवारी र उत्तरदायित्वका साथ काम गर्नुपर्ने जोड दिनुभयो। सञ्चारमन्त्री तिमिल्सिनाले अब समस्या मात्रै औँल्याएर नहुने भन्दै समाधानमुखी सोच र व्यवहार आवश्यक रहेको उल्लेख गर्नुभयो। “आज भनेको भोलिको इतिहास हो।
आज राम्रो काम गर्न सक्यौँ भने त्यसले भोलिको मार्गनिर्देशन गर्छ। आफुले काम गरिरहेका संस्था गर्व गर्न लायक हुने बनाउन कर्मचारीहरुले पनि उच्च मनोबलका साथ सक्रीयता देखाउनुहोला,” सञ्चारमन्त्री डा. तिमिल्सिनाले भन्नुभयो।उहाँले सार्वजनिक संस्थानलाई प्रभावकारी, उत्तरदायी र नागरिकमुखी बनाउन सुधार अपरिहार्य रहेको बताउँदै सूचना प्रविधिको तीव्र विकास र डिजिटल मिडियाको प्रभावसँगै गोरखापत्र संस्थानको पुनर्संरचना आवश्यक भएको धारणा राख्नुभयो। गोरखापत्रको लामो इतिहास स्मरण गर्दै उहाँले पत्रकारिताको शैली, तौरतरिका र प्रविधिमा व्यापक परिवर्तन आइसकेको उल्लेख गर्नुभयो। बदलिँदो समयअनुसार गोरखापत्रले आफूलाई अन्य सञ्चारमाध्यमभन्दा कसरी फरक र प्रभावकारी बनाउने भन्ने विषयमा गम्भीर समीक्षा गर्नुपर्ने बेला आएको उहाँले बताउनुभयो।
नेपालको भाषिक विविधताले देशलाई समृद्ध बनाएको उल्लेख गर्दै उहाँले त्यसको संरक्षण, प्रयोग र अपनत्वलाई प्राथमिकता दिनुपर्ने बताउनुभयो। साथै सञ्चारमाध्यमले नागरिकको अपेक्षा र विश्वासलाई केन्द्रमाराखेर काम गर्नुपर्नेमा पनि उहाँले जोड दिनुभयो। मन्त्री तिमिल्सिनाले नागरिकले तिरेको करबाट सार्वजनिक संस्था सञ्चालन हुने भएकाले नागरिकको हितमा काम गर्नु सबैको प्रमुख दायित्व भएको बताउनुभयो । यसैबीच, गोरखापत्रले आजदेखि सन्थाल र हायु भाषामा समेत समाचार प्रकाशन सुरु गरेको जनाएको छ । सो भाषा सम्बन्धि पृष्ठको प्रतिकृति सञ्चारमन्त्री तिमिल्सिनाले अनावरण समेत गर्नुभयो।
